Pangka dagang ba ngepan Iban

BETONG: Pekayan tradisional Iban tauka Ngepan agi napi mayuh pemar nyerumba segang pemansang menua kelebih agi dalam pengawa dagang temuai.

Pengelicha ti mega nyadi Dekan Fakulti Sains Sosial dan Kemanusiaan (FSSK) Universiti Malaysia Sarawak (Unimas) Profesor Madya Dr Nelson Ilan Mersat madahka taja dagang temuai ditemu ulih nyungkak penatai pemisi komuniti Iban ba menua tu, tang agi bisi empas ti enda manah berindik ari pengawa dagang temuai.

“Ambika chunto orang ke meli ngepan kitai tu, bisi sekeda sida enda bebasaka adat enggau ngepan kitai.

“Ketegal pesaka asal kitai udah nyadi dagang, nya alai ubah ba pesaka baka ngepan deka nitihka peminta temuai ke meli ngepan nya,” ku iya.

Dr Nelson madah munyi nya lebuh bejaku pasal Ngepan Iban Nyungkak Pemansang Budaya enggau Ekonomi ba Simposium Ngepan Iban (SNI) 2019 di Kompleks Opis Perintah Nengeri ditu, kemari.

Nangkan nya ku iya, orang ke meli ngepan nya enda baka kitai ke sigi ngemeran sereta ngempu ngepan nya.

“Kebuah pia, pengudah ngepan nya datai ba orang bukai ke ukai komuniti kitai, sekeda ari ukir tauka pekara ngaul ngepan nya deka bechampur enggau orang bukai.

“Identiti kitai mega deka lenyau berindik ari nitihka peminta temuai ke meli ngepan nya,” ku iya nerang.

Kelimpah ari nya, Dr Nelson madahka pengarap nyadi siti ari kebuah main asal enggau pekara lama enda ulih ditanka baka keli.

“Ketegal mayuh komuniti kitai ke udah bisi pengarap baru, bisi ari sida enda rindu lalu enda ulih ngetanka pekara lama kitai laban deka berubah ngagai pengidup ke baru.

“Taja pia, komuniti ti udah bisi pengarap baru sereta sida ke mengkang ngemeran main asal lama enda patut betalatka pekara nya agi,” ku iya.

Nya alai ku Dr Nelson, komuniti Iban patut besedia napi pemansang globalisasi ngetanka ngepan Iban laban nya identiti bansa.

“Komuniti Iban patut bisi siti galeri tauka muzium ba tiap zon ti ulih mandangka ngepan Iban ari mayuh bengkah bagi menua ngambika ulih narit ati temuai ukai semina ari menua luar tang mega menua kitai empu.

“Pekara nya ulih dipejalaika tiap iku kitai, laban enti kitai ngarapka perintah, nyangka ka lubah ari kitai empu ngaga pengawa nya,” ku iya nerang.

Pengawa bedagangka ngepan bansa kitai endang ulih ngerembaika pesaka asal kitai ngagai menua bukai kelimpah ari nyungkak ekonomi diri sebilik, ku iya nandu.