Pangku Pengawa – Politik: Dua pekara bebida

KUCHING: Menteri Pengawa Berumah enggau Kaunsil Kandang Menua Zuraida Kamaruddin deka ngatur randau enggau Kepala Menteri Sarawak Datuk Patinggi Abang Johari Tun Openg berandauka penanggul ngaul bala tuai rumah di Sarawak.

Ku Zuraida, pangku pengawa bala tuai rumah endang patut diaku nadai ngira penemu politik sida.

“Sida patut diaku nadai ngira penemu politik dipegai laban tu nipakka juluk pemansang dikemeran ba Malaysia Baru.

“Kitai enda patut nyiping sida ketegal penemu politik ti bebida, ulah baka tu enda patut dikembuan laban kitai sama bisi hak nipakka sistem demokasyen ti dikemeran menua.

Pia mega ku iya, bekaul enggau pekara pemansang rumah panjai di menua tu kelebih agi di menua pesisir ti tebal agi jauh tinggal ari sukut infrastruktur pemun enggau ke bukai.

ZURAIDA KAMARUDDIN

“Pekara pasal tanah di baruh bidang kuasa Perintah Sarawak patut diputar memanah nentuka perambu Perintah Besai deka mujur sereta muntang agi dipejalai.

“Tu mega dikena mantu peranak rumah panjai nya empu ti udah lama randakka pemansang,” ku iya madah nyemetak tadi.

Ku Zuraida, penatai iya di Sarawak beserimbai enggau Pengeramai Makai Lemai Pakatan Harapan (PH) mega beratika rayat Sarawak gagit nganti ubah deka dibai bala ketuai perintah baru.

“Sida mega nganti ubah besai deka nyadi maya Pengawa Bepilih Nengeri Sarawak (PRN) ke deka datai.

“Rayat ulih ngasaika niat enggau pengelurus kitai gawa mutarka penanggul sereta nangkup peminta sida nuju Malaysia Baru ti mansang ari semua sukut.

“Aku mega nerima mayuh penerang enggau sebana rayat menua tu nyengkaum pekara bekaul rumah panjai enggau genturung pendiau di Sarawak baka ti diripot surat berita ditu,’ ku Zuraida nandu.