Pansik baru RUU – Willie Mongin

KUCHING: Kaban Parlimen Puncak Borneo Willie Mongin kurang gaga enggau perambu ubah Perkara 1(2) Kostitusyen Perintah Besai ke agi ngerintaika Sarawak enggau Sabah nyadi nengeri dalam perintah besai.

Ku iya, Rang Undang-Undang (RUU) Konstitusyen (Ubah) 2019 patut dipansik baru.
“Sarawak enggau Sabah patut disebut Menua, ukai agi sebengkah nengeri dalam perintah besai” ku iya lebuh dirandau, ensana.

RUU Konstitusyen (Ubah) 2019 kena mulaika hak-hak ba Sempekat Malaysia 1963, dibantaika Menteri ba Opis Kepala Menteri, Datuk Liew Vui Keong nengah bacha keterubah ba Aum Parlimen ensana.

Taja pia, ubah tu agi ngerintaika nengeri-nengeri perintah besai dibagi ngagai (a) Johor, Kedah, Kelantan, Melaka, Negeri Sembilan, Pahang, Perak, Perlis, Pulau Pinang, Selangor sereta Terengganu lalu (b) Sabah enggau Sarawak.

Pejurai nya madahka Fasal 2 RUU nya dikena nganti Fasal (2) Pekara 1 Konstitusyen Perintah Besai dikena madahka semua Nengeri numbuh Perintah Besai ngambi mulaika, ngubah, penuduk Fasal(2) Pekara 1 Konstitusyen Perintah Besai lebuh penumbuh Malaysia kena ka taun 1963.

Ubah tu digaga seriris enggau Sempekat Malaysia kena ke taun 1963.

Ubah tu mega dikena ngamatka juluk enggau pengandal Perintah sereta rayat Nengeri Sabah enggau Sarawak.

Ubah tu, nengah mayuh bengkah chara, enda ngubah tanggung pengawa Perintah Besai enggau Perintah-Perintah Nengeri baruh konsep federalisme.

Sebedau RUU dibacha, Aum Parlimen chapuh lebuh mayuh Kaban Parlimen ke lebih agi ari Sabah enggau Sarawak angkat mantah pejurai nya nyengkaum madahka enda nerima notis dalam timpuh 24 jam ngambi beratika isi RUU nya.

Willie Mongin