Pansik enggau profesional, kes nangkap pemesai Salcra

KUCHING: Sapit Kepala Menteri Datuk Amar Douglas Uggah Embas madah naka tu, iya bedau ulih meri timbal bekaul enggau kes tiga pemesai opis Salcra ke dipansik Komiti Nagang Makai Suap Malaysia (SPRM).

“Taja pia, aku ngarapka SPRM ulih bejalaika pansik enggau profesional sereta nitih atur ditetap.

“Sebarang pemutus pansik sentang kes, patut diterima semua,” ku iya bekaul kes makai suap pengereja pengawa senior Kaunsil Pengempung enggau Nyaga Tanah Sarawak (Salcra) ke dipelaba bisi kaul enggau penyalah makai suap.

Uggah ke mega Chairman Salcra madah munyi nya lebuh dirandau raban pemberita pengudah pengawa Nyain Sempekat Pemereti Ati (MoU) di Wisma Bapa Malaysia ditu, kemari.

Apin lama ti udah, ripot madahka piak SPRM ngetan tiga pengereja pengawa senior Salcra enggau siku pengereja pengawa dagang ba kes bekaul enggau penyalah makai suap.

Sida tu berumur entara 52 ngagai 67 taun nyengkaum siku pemesai bepangkat Datuk berumur 59 taun lalu kes nya agi mengkang dipansik.

Taja ba ripot berita ke ayan kemari, peminta SPRM ditulak Kort Majistret laban peminta riman nya nadai nerintaika kebuah sida tu diriman.

 

NYAIN SEMPEKAT…Uggah (bediri tiga kiba) enggau Jabu (bediri, tiga kanan) sereta bala pemesai bukai ngemataka pengawa nyain MoU entara Dr. Alvin Chai Lian Kuet (duduk kiba) enggau Fitriah Rahbi (duduk dua kanan) di Wisma Bapa Malaysia, kemari. -Gambar Ghazali Bujang