Pansik sains nyerungkai pemanah letup

LETUP tauka nama saintifik iya Passiflora Foetida, sebansa utai tumbuh nyerangkap sekalika ba tanah tauka sebelah pating kayu mit bukai ke bisi tumbuh ngelingi.

Ba menua kitai di Sarawak ditu tebal agi letup idup dalam babas tauka tanah ujung bilik begulai enggau utai tumbuh bukai baka pun kemunting laban nadai entu beleman endur iya tumbuh.

Sekali tu Suara Sarawak mai kitai ngelansa sekeda gaya pendiau enggau guna utai tumbuh ti dikumbai letup lalu sekeda menua di Pelilih Meradong ngumbai iya kemibit.

Nitih ku penerang ari sekeda portal berita dunya, letup tu asal iya ari menua Amerika Selatan enggau Amerika Tengah lalu diguna dalam bidang perubat.

Taja utai tumbuh tu apin dipasuk dalam kategori utai tumbuh karnivor tang mayuh pansik ti dipejalai madahka buah letup ngundan mayuh leka bechura chelum. Leka dibungkur isi buah bechura burak taya, lunak sereta masam manis.

Pansik sains nyerungkai pemanah letup

Akar dikena nyumanka besintak urat tauka besintak gumpal isi lalu ulih ngaum orang ti kusut runding ari nyida. Daun letup diiting sereta ditutuk dataika anchur lalu diunsut ba abi telih, ditandu dataika telih suman.

Batang, akar enggau daun letup tau direbus dataika melidih lalu ditejuka nyilu kukut pengangat kena nuchi telih, kulit ke raing enggau gelata. Ai rebus tu tadi mega ulih diirup kena ngeraika batuk.

Kelimpah ari nya, daun enggau batang letup bebulu alus. Kantuk enggau daun letup ke puda tau diambika lauk, sekalika diresih pia aja tauka kena ngulai lauk bukai baka salai sereta tau mega direbus gulai pusu kelimpah diulur ke ulam, dichal ngena sambal belachan, chabi enggau pusu tutuk.

Chara mela mega rumpas endar, daun ke udah diiting deka diperuk dulu dalam ai dataika bepupu dikena muai bau pang sebedau dipanduk. Daun letup bisi asai ka pepait tang enda mait daun peria.

Bungai letup deka ngeluarka buah ti mega tau diempa ke alai bala nembiak mit ke bemain sebelah tanah suah musil buah ari tangkai, buai kibung ke ngeraga buah lalu disuap lalu asai iya masam-masam manis.

BELANGGU… Bungai ti udah chukup tuai deka mansutka langgu buah letup.

Enti agi puda, buah letup bechura gadung lalu deka mali chura kuning tuai enti udah chukup tuai tauka mansau. Buah puda deka bepuak, kelat sereta enda nyamai diempa.

Randau letup mega suah nyadika tali kena nanchang utai baka nanchang perekas batang empasa ti deka diambika paung lalu ditanam ba bakut sayur.

Sida ke tuai menya suah nundi sida ke nembiak ngena leka main lebuh lepa ari pengawa kelebih agi duduk betunga lemai hari ba ruai seraya berandau.

Sebagi ari leka main suah dikena betundi iya nya entelah ke alai sida ke tuai ngelalai lalu ke nembiak ngiga sereta nyaut lalai entelah nya tadi.

Siti ari lalai entelah ti ngelalaika buah letup munyi tu, Ada siku tangkup tabil, ada siku tangkup tabil, bala nembiak ransing sereta gagit deka nemu saut lalai nya.

Nya alai, ba penemu pengarang, tu sebagi ari chara kaul rama enggau dikena sida ke tuai nguji penajam runding bala nembiak kelimpah ngajar sida berunding kenyau ari mit.

Ari bansa utai tumbuh baka letup tu mayuh mai reti ba daya idup kitai bansa kenyau ari kelia nyentuk diatu, tau nyadika pemakai, ubat sereta malin ba leka main Iban.

TUMBUH NYERUNGKAP… Batang letup deka nyerungkap sebelah pating tauka utai bukai endur iya bepaup.

 

MASAM-MASAM MANIS… Isi burak enggau leka chelum enti buah chukup mansau.