Pansik saintifik besai guna ngagai tanah kerapa

KOTA SAMARAHAN: Sarawak mesti mandangka penerang saintifik ngagai dunya mandangka tanah kerapa nya besai guna dalam pemansang ekonomi.

Kepala Menteri Datuk Patinggi Abang Johari Tun Openg madahka bukti saintifik nya beguna amat nunjukka sekalika pekara nya betul tauka salah ngambi meri pengandal ngagai dunya.

“Nengah penerang saintifik nya, kitai (Perintah Sarawak) nyukung Institut Pansik Tanah Kerapa (Tropi) Sarawak bejalaika pansik.

“Kebuah pia laban pansik saintifik nya pekara ti besai guna,” terang iya.

Abang Johari mansutka jaku nya rambau Pengerami Makai Lemai beserimbai enggau Makai Taun Ke-10 Gerempung Tanah Kerapa Malaysia (MPS) di Tropi, malam ensana.

Nambahka nya ku iya, Sarawak naka ulih ngulihka bukti saintifik nya lalu diatu kini kecerdasan buatan (AI) sereta analisis penerang ulih diguna.

“Gempung penerang lalu asil ari penerang nya kitai ulih mutarka pemar lebuh kitai ngemansangka tanah kerapa nyadi sebagi ari pemansang ekonomi,” terang Abang Johari.

Abang Johari madahka asil nya ulih dikunsi ba serata dunya lebuh bekenaka teknologi baru enggau analisis penerang.

“Kebuah pia, ukai semina Malaysia aja ngembuan tanah kerapa tang Indonesia enggau Pulau Pasifik mega ngembuan mayuh tanah kerapa.

“Nya kebuah, batang tuju kitai tu ukai semina ungkup Sarawak tauka Malaysia.

“Awakka Sarawak nyadi tulang belakang meri pengandal ngagai dunya pasal tanah kerapa besai guna dalam pemansang ekonomi kitai,” ku Abang Johari nyemetak madah.

Ku iya, pansik silik mega dipejalai ngambi meri pengandal ngagai dunya pasal karbon ukai semina dilepas ketegal tanah kerapa.

“Sarawak mega keran ngembuan kuasa beresi enggau enggai ngamahka rampa menua.

“Kitai tu keterubah iya bisi utai tanam prototaip ngambi ngeluarka kuasa hidrogen di Asia Tenggara,” terang iya.
Abang Johari madahka pengawa ngaga jalai, jematan sereta palan pengentap enda ulih diseliah ba tanah kerapa.

“Apin lama, kami madahka diri deka ngemansangka palan pemansik penyakit berampit ngambi ngasilka vaksin Covid-19.

“Nya kebuah, aku ngasaika kitai ulih bejalaika pangku pengawa tu ungkup dudi hari lalu aku andalka MPS enggau Trofi ulih bejalaika pengawa nya,” tandu iya.

Kelimpah ari nya ku Abang Johari, Perintah Sarawak mega deka nyendiaka agih belanja ungkup pengawa mansik nya laban kitai bisi belanja ari bayar chukai jual nengeri ari Petronas.