KUCHING: Perintah Sarawak andalka pansik sejarah lama ulih dipandang nengah program enggau aktiviti seni teater ngambi mensia mayuh muntang enggau mereti agi pasal pekara nya.
Premier Sarawak, Datuk Patinggi Tan Sri Abang Johari Tun Openg madah, perintah menua keran deka meda chara ti bebida ba pengawa ngayanka turai sejarah lama menua.
“Keterubah kitai ulih ngaga pansik ari artifak tauka keresa lama, udah nya lalu nguji nyalin sejarah tu ngagai pengawa pemandang baka muzikal ngambi mensia mayuh muntang meretika sejarah tu.
“Nya kebuah Perintah Sarawak meri agih belanja lebih RM200 juta dikena kitai ngemanah Palan Pemansang Seni di Kunsil Nengeri (DUN) Lama ungkup pengawa mandang ke seni pemerindang menua kitai,” ku iya.
Abang Johari bejaku munyi nya rambau Pengawa Ngelanchar Hari Antarabansa Muzium Renggat Nasional 2023 ba BCM ditu, tadi.
Ku iya, sida mega udah nganjung sebuah tim meda balai besai Royal Albert Hall di London ngambi ulih nunda enggau neladan palan nya ba ditu.
