PERU: Sebengkah pengawa nyengai pemati siku indu ba Peru balat dikemegau mensia mayuh pengudah indu nya idup baru lalu bisi didinga ngetuk ari dalam sentubung.
Pekara nya nyadi kena 26 April taun tu lebuh kaban belayan niang Rosa Isabel Cespedes Callaca begelumu meri basa kepenudi ngagai iya ti bebadi nyawa ba penusah aksiden jalai alun.
Penusah aksiden nya bela nabanka nyawa ipar lelaki iya, dua anak menyadi iya balat bakal lalu Rosa empu dikenuku raban sepital bebadi nyawa.
Taja pia, lebuh kaban belayan Rosa benung ngangkat sentubung iya, dia sida ninga bisi orang ngetuk ari dalam sentubung.
Lebuh sida muka penutup sentubung nya, sida balat tekenyit meda tubuh Rosa ti udah parai nya idup baru lalu iya lemi tulang maya merening sida.
Sida sebilik nganjung iya ngagai sebuah sepital ba mengeri Lambayeque ngambi diperesa lalu lutur meri mesin bantu enseput sebedau iya mutus ke seput baru berapa jam pengudah nya.
