KUCHING: Kerejasama entara parti penyakal di nengeri chukup beguna dikena nentuka juluk mai ubah ngagai rayat Sarawak nyadi nyata.
Kaban Kaunsil Presiden PSB, Baru Bian madah baka ke udah dipadahka Presiden sida (Dato Sri Wong Soon Koh) sebedau tu, PSB sediaka bekerejasama enggau sebarang parti penyakal ke ngembuan juluk enggau penemu ke sama.
“Juluk ke sama nya, mai ubah ngagai semya rayat Sarawak nukar perintah ke diatu (GPS/BN) ke udah lama merintah Sarawak.
“Taja udah lebih 50 taun merintah Sarawak tang kitai agi mengkang nyadi nengeri ke pemadu seranta ba Malaysia.
“Enggai nyadi sampai bisi tiga iku bepadan tauka lebih entara parti penyakal enggau GPS,” ku iya madah nengah sebengkah penerang ba laman Facebook iya, kemari.
Nangkan ke nya, iya madah randau udah digaga chukup lama lalu benung bejalai sereta ngarapka bisi penemu ke seati dijapai udah tu.
Baru mansutka pekara nya nimbal penerang dipansutka Malaysiakini kena 6 Nov 2021 bekaul enggau jaku Chariman DAP Sarawak Chong Chieng Jen ti madahka DAP ngasaika chukup mar deka bekerejasama enggau PSB laban ngumbai PSB bisi juluk ke sebaka enggau GPS.
