Parti politik udu belaya tusah ngatur pemansang

LINGGA: Kepala Menteri Datuk Patinggi Abang Johari Tun Openg madah enti sesebengkah parti politik udu belaya dia sida tentu tusah deka ngatur pemansang dikeingin rayat.

“Nyai alai, ketuai enggau parti politik GPS nadai belaya.

“Enti kitai majak belaya baka ni kitai deka ngatur pemansang ke dikeingin rayat.

“Anang baka sebuah parti ‘nya’ ke nadai pengawa bukai, belaya aja nyentu sehari tu enda badu. Agi ngiga Menteri Besai kelapan.

“Bebida enggau kitai ba Sarawak, taja ketuai suah betukar tang sapa aja diangkat nyadi ketuai, nyadi nya mih ketuai ungkup semua rayat Sarawak… udah nya ngamatka semaya kelimpah ngatur pemansang ungkup rayat,” ku iya.

Abang Johari madah munyi nya rambau bejadika Pengerami Nasih Tanah projek Pemansang Tebing Sungai enggau Palan Servis Lingga ba Pasar Lingga, kemari.

Berebak enggau nya iya meri tangkan ngagai sebarang piak ke nguju deka ngerampas sereta ngachau rayat Sarawak.

Ku iya, Sarawak sempama baka indu bajik nyentuk diperebut mayuh piak (parti politik).

“Laban Sarawak ‘bajik’, nya kebuah semua orang deka nguji.

“Sida KL din deka ngerampas, enti iya enda meri ‘salam’…Jaga iya! Aku ‘go head’.

“Anang sesekali ngachau adat orang Sarawak,” ku iya bejaku rambau bejadika Projek Pemansang Tebing Sungai enggau Palan Servis Lingga ke bela beungkus RM5 juta ba Pasar Lingga, kemari.

Ku iya, rayat ba nengeri tu chukup betuah laban ulih idup lantang nengah iring raban ketuai Gempung Parti Sarawak (GPS) ke beguna awak ngemansangka nengeri.

BEJADI… Abang Johari begambar enggau bala temuai ke bukai pengudah bejadika kelai Nasih Tanah Projek Pemansang Tebing Sungai enggau Palan Servis Lingga di Pasar Lingga, kemari. -Gambar OSMAN RAZALI