Pasar Kapit deka dikemansang nitih perambu

KUCHING: Menteri Muda Kaunsil Kandang Menua Datuk Dr Penguang Manggil madahka Perintah Sarawak benung bejalaika Pansik Pelin Besai Pasar Kapit ti meruan agi.

Ku iya, tu dikena nentuka kesemua perambu pemansang di menua nya deka lanchar sereta mujur dipejalai.

Iya mansutka jaku nya lebuh nyaut tanya ari Adun Pelagus-PRS, Wilson Nyabong Ijang, rambau hari kelima Aum Keterubah Penggal Keempat Dun ditu, kemari.

Penyampau entukar di Pasar Kapit diatu ku iya majak nambah nyerumba pemansang dipejalai di menua nya.

Iya mega melabaka jalai di Kapit deka majak sekut ari pemisi Jalai Kapit-Sibu ti deka tembu datai ba taun 2020.

“Pansik pelin tu berundingka peminta enggau peneka rayat sereta pemansang mayuh bengkah infrastruktur pemun nyengkaum pengawa mutarka penyekut jalai di Kapit.

“Taba ti diperambu ungkup pemansang jalai tu enda tau enda ba endur ti engkeman,” ku iya madah nyemetak.

Berindik ari nya, pansik pelin besai tu dipelaba tembu dalam timpuh enam ngagai lapan bulan, suku ketiga 2019.

“Nengah belanja ungkup bejalaika pansik pelin tu mega deka disengkaum dalam Atur Pemansang Malaysia Lumpar Ke-12 (RMK12),” ku iya nerang.

Datuk Dr Penguang Manggil