ARTIKEL

Pasar Lubok Antu diatu jauh berubah

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

Pasar Lubok Antu iya sebengkah pasar ke bepalan semak garis entara menua enggau Nanga Badau Kalimantan Barat, Indonesia lalu pejalai peranak menua tu ari enti deka ke pasar Badau ngambi awak urung 30 minit.

Bekau ari segang pemansang diatu Pasar Lubok Antu bisi bendar penau nyadi sebengkah ari palan dagang temuai ba Sarawak.

Entara palan ke suah ditapatka temuai ari menua bukai di Lubok Antu iya nya Tekat Hidro Batang Ai. Kelimpah ari nya, bala temuai mega bepeluang meda jelu siga baka mayas, burung kenyalang enggau bukai dilindung Taman Negara ditu.

Ungkup raban temuai ke deka ngasaika pengidup diau ba rumah panjai orang Iban, sida mega ulih bemalam ba ‘homestay’.

Tambah mega, pasar Lubok Antu tu tau dikumbai palan pesaka endur ngiga ngepan indu Iban tauka sebarang keresa asal Iban. Semua perengka lama Iban diperita dijual enggau rega ke numbas iya dibanding enggau endur bukai.

Selamat datai ke Pasar Lubok Antu

Kepala Menteri Datuk Patinggi Abang Johari Tun Openg mega seruran beratika pelilih Lubok Antu enda dikelaung ngasaika pemansang baka ba endur bukai. Nya lalai sebedau tu iya udah ngemendar projek pemansang ungkup Lubok Antu sepenyampau RM26.6 juta nyerumba Program Sejiwa Senada 2018 ke diatur ba Pasar Lubok Antu dikena nyungkak sosio ekonomi peranak menua nya.

Nyerumba pengerami nya, Abang Johari netapka Pelaman Keling dikemanah nyadi Town Square Lubok Antu.

Bekau ari nya, kitai meda diatu Pasar Lubok Antu balat bendar berubah sebaka enggau pelilih menua ke bukai laban udah bisi Riverine Park Waterfront Lubok Antu enggau Projek Pelaman Keling ke baru tembu taun tu tadi.

RICHAH NINTING MINGGU

Kenyau ari kelia, Pasar Lubok Antu lebih agi palan tebing sungai Lubok Antu seruran richah ditapatka mensia mayuh lebih agi maya ujung minggu.

Tang diatu, chukup sekumbang pengerekai Covid-19 dia Waterfront Lubok Antu nyau jarang ayan mensia beduduk ari peranak menua ngasika Atur Pengawa Standard (SOP) ke udah digerah perintah.

Sebedau pengerekai Covid-19 suba, tuai besai, anak mit enggau raban nembiak endang suah dipeda ngelantang ati ba palan tu.

Nya alai, kitai bela besampika awakka Covid-19 jampat pukas ngambika mensia mayuh ulih bejalaika pengidup baka selama.

Pelaman Keling diatu chukup manah endur ngelantang ati.

PALAN NGELANTANG ATI

Nyema menua udah suman ari Covid-19, kitai meransang mensia mayuh di selampur nengeri tu ke apin kala nemuai ke Pasar Lubok Antu gaga mih awak datai kitu mai diri sebilik.

Diatu Taman Rekreasyen Lubok Antu udah disikap menyana sereta disediaka enggau bangku, padang main bol enggau punduk.

Ikon ba palan rekreasyen tu mega ulih matak ati mensia mayuh iya nya sebuah agam mayas ke besai sereta tinggi.

Dua buah genturung pendiau ke pemadu semak enggau Pasar Lubok Antu tu iya nya
Kampung Kutai enggau Kampung Melayu.

Peranak menua tu chukup kemerah enggau bala temuai ke bisi datai. Taja pedagang ke mayuh bejual ba Pasar Lubok Antu tu bebansa China tang sida chukup landik amat bejaku Iban nyengkaum pemberita empu ke endang asal ari Kampung Melayu ditu.

Ikon Taman Rekreasyen Lubok Antu iya nya siku mayas.

 

Waterfront Lubok Antu diatu udah disikap menyana.

 

BERITA LAIN

BERITA TERBARU