Pasar Spaoh terus dikemansang

SPAOH: Pasar Spaoh terus dikemansang nengah nengah beberapa projek besai ari Perintah Sarawak bepun taun tu.

Sapit Kepala Menteri Datuk Amar Douglas Uggah madah, projek beungkus lebih RM30 juta nya nyengkaum ngaga opis pelilih mit, Kompleks Lumba, ngaga pasar baru enggau mega projek ngemanah Tebing Sungai Spaoh.

“Pengawa ngaga opis pelilih disadang tembu bulan September tu ditampung enggau pengawa ngaga Palan Betanam Betupi Spaoh beungkus RM3.5 juta.

“Mula suba, kami udah merambu agih belanja penyampau RM7 juta ungkup pengawa betanam betupi tang nitihka sanding penemu Abang Johari, kami beratika perambu nya setipak enggau pengulih pengawa betanam betupi ba sitak tu,” ku iya.

Uggah mansutka jaku nya ba Pengerami Taun Baru China diatur Gerempung Spaoh Tiong Hua di dewan komuniti Spaoh, apin lama ke udah.

Ku Uggah, Pasar Spaoh mega deka digaga padang bilun beungkus RM108.3 juta dalam kandang empat taun agi dikena ngangkut produk betanam betupi ari sitak nya ngagai makit luar.

Nambahka nya ku iya, pemansang nya udah ngayanka Perintah GPS ukai semina landik bejaku tang ngamatka semaya sida ngagai rayat.

Suara Sarawak