KUCHING: Patricia Limau ngandalka produk kraf iya udah tu ila ulih rembus ngagai menua luar.

Patricia ke mega champion Pekit Tangu Online 2021 madahka iya deka nampung dagang kraf tu seagi nerima udar laban iya pechayaka dagang kraf tu ulih nyungkak penatai pemisi sida sebilik.

Enda ga bangat besai juluk ati tang ngarapka produk kraf aku tu ulih rembus sereta dikelala ba menua luar, ku Patricia.

“Kebuah pia laban aku keran dekaka pengelandik enggau ukir asal kitai Iban tu dikelala ba serata dunya.

“Nyadi, pengudah menggi gelar champion Pekit Tangu Online 2021 apin lama, Puji Tuhan bisi orang nganjung pesan madahka diri deka ngudar tangu ukir kenyalang nya.

“Nya kebuah, ba aku pekit baka tu chukup manah laban tu sebagi ari chara mantaika keranjai jari kami pedagang kraf.

“Bisi mega bala penguna bukai ngudar tangu ukir bukai ke dipilih enggau dikedeka sida empu.

“Aku mega ngarap, udah tu diberi peluang nyereta kus bekaul enggau kraf jari dikena ngansah pengelandik enggau penemu diri.

“Taja udah landik ba pengawa betusukka leka manik enggau pengelandik bukai tang aku keran deka nyereta kus (kraf jari) udah tu ngambi ngembuan mayuh agi penemu,” ku tuju ati Patricia.

Peranak asal ari Song tu mega madah, orang ke balat meransang iya ba dagang kraf tu nya laki iya enggau sida sebilik.

NGANSAH PENGELANDIK

Ku Patricia, sida sebilik meransang iya berengkah bejualka produk kraf nya laban iya endang landik betusukka leka manik.

“Pengudah mendingka jaku peransang nya, berunding ga tudah aku ari ke diau ba rumah nadai ngereja pengawa bukai, manah ga aku betusukka leka manik ke ulih ngenataika untung.

“Ari nya, aku pen berengkah ngambi udar suba lalu mantaika sekeda produk kraf digaga aku ba sebelah media rama.

“Aku mega bisi masuk kelas belajar nyait kain burie enggau sugu tinggi diajar Pengajar Roselind Ngali enggau Pengajar Alvina.

“Seduai mega entara orang ke suah meri jaku peransang ngagai aku ngambi enda mantul ngapa ba dagang kraf tu,” terang Patricia.

Patricia, 40 taun madah, dua iku pengajar kraf nya suah ngajar iya anang ngetu ngaga tangu tauka produk bukai ari leka manik.

Tang iya berasai gaga ati laban iya suah nerima udar ari bala penguna ke rinduka pemanah keranjai jari iya baka tangu nya.

Nampung baru kenang pejalai Patricia ba dunya dagang kraf, dia iya madahka diri terubah belajar nusuk leka manik ari bakih iya.

“Terubah belajar nusuk leka manik, bakih aku ngajar betusukka manik nyadika pengias dalam kerita aja.

“Tang enti baka tangu nya, aku nadai belajar ba orang laban aku sigi nguji ngepunka kediri nunda enggi orang sebelah Facebook.

“Suah mega aku meda group Berkongsi Hasil Manik Sahaja ba Facebook.

“Pemuas ke meda pemanah keranjai jari bala pedagang dalam group nya, nyau tekait ati ga lalu berunding ga tudah aku deka belajar ngaga tangu nunda enggi sida.

“Terubah suba, aku endang nadai runding deka ngaga tangu ke jual laban semina ngaga ungkup diri empu aja.

“Tang ninga jaku peransang ari kami sebilik, bala pengajar enggau meda penguntung ari produk kraf tu, aku pen berengkah bedagang.

“Naka pengaga laban mujur ngaga tangu nunda enggi sida dalam group ba Facebook nya tadi.

“Terubah belajar ngaga tangu nya, amat bebulan alai aku nembuka siti tangu.

“Ni ke salah, adu baru laban enti ari pun udah salah, ka pen enda ngepunka baru baka asal megh.

“Nya kebuah ba pengawa betusukka leka manik tu kitai mesti puh sereta kreatif ngambi narit ati bala bukai,” ku Patricia mulaika kenang keterubah betusukka leka manik.

LIAT ATI

Ngenang pasal gaya dagang iya ngelama tu, Patricia madahka enda tetap laban kekadang bisi ga nerima udar, bisi maya nadai nerima udar.

Tang iya lantang ati laban semampai nerima udar kenyau ari tengan taun 2020.

Kelimpah ari tangu, Patricia madahka iya bisi ngaga produk bukai ari leka manik baka marik marimar, marik kabo, marik moden, tali nametag, lupong manik enggau selampai manik.

Tambah mega, iya bisi bejaitka kain burie pengudah belajarka pengelandik nya ari Pengajar Roselind Ngali enggau Pengajar Alvina.

“Enti pasal pemar ngaga tangu, kebendar ba penemu aku pemar nya bepanggai ngagai ukir ke deka digaga kitai.

“Sigi mayuh chara ke mesti diadu enggau dititih kitai sebedau ngepun ke tangu.

“Aku suah nitihka tiga chara baka keterubah, nguntin ubung. Kedua nya ngeraut ujung ubung lalu ketiga ngegam ujung ubung.

“Kitai mesti sabar sereta liat ati lebuh nitihka tiga chara nya ngambi enda salah.

“Udah nya, enti sema kitai ngaga ukir tangu pisit, ngena seleka manik aja.

“Amat suah meh nambahka tubu ubung dikena nentuka tangu digaga kitai nya ngerembai manah.

“Pengudah tangu tembu digaga, pengawa ngaga pom-pom tauka langgu tangu mega mar ba aku laban ngaga langgu nya bisi chara iya empu,” terang iya sentang ‘tips’ ngaga tangu.

UKIR KENYALANG

Tangu ukir kenyalang udah mai tuah ngagai Patricia ngujungka iya menggi gelar champion laban pengalus ukir tangu nya udah narit ati bala akim enggau mensia mayuh.

Patricia madahka iya ngaga tangu ukir kenyalang nya pengelama tiga minggu.

Ku iya, terubah ngaga ukir kenyalang nya suba laban bisi siku penguna ngasuh iya ngaga ukir baka nya.

“Nyadi, aku minta ari iya chunto gambar semak tangu ke udah tembu digaga orang.

“Penguna nya mega ke meri aku gambar semak tangu nya suba, aku semina nunda gambar nya aja.

“Enti ditanya pasal penti pemali lebuh ngaga ukir kenyalang nya, ba aku empu nadai ga penti pemali.

“Tang, enti nitihka jaku ajar orang tuai, sebarang ukir ke digaga kitai mesti bepun ngaga ukir ke mudah dulu.

“Baka aku suba, ukai lalu terus ngaga ukir ke mar laban aku endang ngiga ukir ke muntang dulu, munyi ku orang tuai dikena ngelemi tauka matih jari dulu ngambi sikar ngaga ukir ke mar dudi hari.

“Baka ukir burung kenyalang tu, enti kitai bedau landik endar sigi pedis ngaga tangu ukir baka nya.

“Tang enti kitai endang lama udah bisi pengelandik nusuk tangu, nadai ga bangat pedis ngaga ukir kenyalang nya.

“Nya kebuah, kitai mesti ngaga ukir ke muntang dulu,” ku Patricia madah.

Nambahka nya, Patricia madah orang keterubah meli tangu iya nya anak menyadi bakih iya laban tekait ati meda pemanah tangu dibantai ba Facebook.

Udah nya ku Patricia, anak menyadi bakih iya madahka rindu meda pengalus tangu nya ngujungka iya meli dua iti tangu baru enggau ukir ke sebaka.

Naka diatu, semua produk kraf digaga Patricia semina kala dibeli penguna ba selampur Sarawak aja.

PELASAR DIGITAL

Bekenangka pengelebih teknologi baru, lebuh mantaika penemu diri dia Patricia madahka teknologi baru tauka pelasar digital tu ngembuan mayuh pemanah enti diguna enggau betul.

“Ba penemu aku, media rama tu ulih nyadi jalai ngelakuka dagang kitai ngambi muntang agi ditemu mensia mayuh.

“Kitai mega muntang berandau enggau sida ke deka meli produk nya laban ulih mantaika gambar produk dijual kitai taja enda betemu mua.

“Ngena peluang enggau pemisi pelasar digital tu, aku mega bisi ngaga page endur ngelakuka semua produk ke udah tembu digaga.

“Nya alai, mensia mayuh ke deka meda produk digaga aku, kita tau ngelawa Facebook Pages aku, Tricia Yusmau Craft Collection.

“Baka ke udah dipadah aku dulu, aku bisi masuk group pasal pengelandik jari ba Facebook.

“Chukup manah bisi group baka nya laban mayuh penemu ulih dipelajar aku dia, tambah mega mayuh agi utai ke dikerandau kami sebuat pasal chara ngaga produk ari leka manik.

“Dalam group nya, kami ulih sama bekunsika asil pengelandik jari ke udah digaga.

“Suah mega aku bekunsika chara ngaga ukir kenyalang ngagai bala bukai laban aku rindu meda orang bukai sama bisi minat ngaga ukir nya,” ku Patricia madahka iya chukup rindu bedua penemu ngagai bala bukai.

Naka diatu, iya madah semampai nerima udar tang semina ulih ngaga dua iti tangu aja sebulan laban lama diri nembuka siti tangu nya.

Berebak enggau nya, Patricia madahka untung iya sebulan kita dalam RM600 ngagai RM800 lalu iya madahka nya chukup dikena nambahka penatai pemisi sida sebilik sereta nyaup laki iya.

JAKU PERANSANG

Baka pedagang bukai, Patricia sebana napi pemar maya pandemik Covid-19.

Ku Patricia, entara pemar sekumbang pandemik tu iya nya kedai bejualka leka manik mayuh tutup.

“Aku endang nerima udar tangu belama tang pedis deka ngiga kereban baka leka manik enggau ubung laban kedai bejualka leka manik tutup sekumbang pandemik tu.

“Tang nasip amat ga diatu bisi pelasar online dikena bebelika kereban diguna.
“Nyau limpang ngagai pekit online sehari nya, ba aku chukup mayuh pemanah ari pekit online tu baka tu meh peluang bala pemekit mantaika produk pengelandik jari sida ngagai mensia mayuh.

“Nya mega sebagi ari chara nentuka mensia mayuh nemu kami bisi bedagangka produk pengelandik jari.

“Pesan aku nuju bala pedagang kraf bukai, anang leju mantaika produk kraf digaga kita lalu anang enggai bejual ketegal untung mimit aja.

“Laban ari ke mimit nya meh kitai mupuk nitihka singkang orang bukai lalu anang mantul ngapa ba pengawa ke tau ngenataika penguntung ngagai ruang bilik kitai.

“Nuju rebak baru, anang enggai belajarka pengelandik asal kitai Iban tu ngambi pengawa tu enda lesap diserunyut arus pemansang dunya.

“Diatu, bemacham chara endur kitai belajar, ambika banding ba media rama baka Facebook, Instagram enggau Youtube.

“Pengawa baka tu ukai semina ngenataika mayuh untung tang ulih ngangkatka pengelandik asal kitai ngambi dikelala ba serata dunya,” ku jaku peransang enggau jaku lalau Patricia nuju rebak baru.