Patut sedia nerima bangkai pesakit Covid-19 ditumbak ba menua diri

JULAU: Ketuai Raban Bansa lebih agi Tuai Rumah tauka peranak sesebengkah menua dilalau patut sedia nerima nyema bisi diri serumah dikenuku bebadi nyawa ketegal dirampit penyakit Covid 19 ngambi ulih ditumbak ba pendam menua sida empu.

Chairman Kaunsil Pelilih Pesisir (MDLB) Sibu, Sempurai Petrus Ngelai madah, tu beduduk ari bisi siti penyadi kes lebuh siku peranak rumah panjai ari pelilih Julau enda setujuka bangkai orang ke udah dikenuku bebadi nyawa ketegal Covid-19 dibai pulai ke menua.

“Nyadi pekara tu, patut diputar enggau manah laban genap sida ke udah bebadi ketegal penyakit Covid-19 tu kebendar endang udah diintu raban Opis Pengerai Malaysia (KKM) enggau likun.

“Peranak rumah panjai enda ibuh kelalu irau ati laban bangkai orang tu enda ibuh disenggai tauka ditiki ngagai rumah panjai. Sida semina dipinta ngemendarka bangkai nya tadi ditumbak terus ba pendam lalu nitihka Atur Pengawa Standar (SOP) KKM.

Sempurai bejaku munyi nya lebuh dirandau Suara Sarawak bekaul enggau siti penanggul ke nyadi di Pelilih Julau lebuh siku peranak menua udah dikenuku KKM bebadi nyawa ketegal dirampit Covid-19 tang ditagang sida serumah dibai pulai ke menua, kemari.

Nya alai, iya ngarapka pekara tu patut dikerandauka enggau manah ke pemaik dudi hari laban penusah ke bansa tu iya nadai pulaika penanggul enti bisi kerejasama entara raban KKM enggau ketuai komuniti.

“Nya alai, pekara ti patut dikereja ba jam ke diatu iya nya kitai patut sama betulung besukung sereta ukai nambah penusah diri serumah ke benung tasah laban penusah ke baka tu naka ulih diseliahka kitai,” ku iya.