PBB Gedong deka ngatur mayuh agi program pemansang

KUCHING: Parti Pesaka Bumiputera Bersatu (PBB) Pampang N.26 Gedong deka neruska pengawa ngatur mayuh agi program pemansang ba sitak bepilih nya sepanjai taun tu.

Ketuai Pampang PBB N.26 Gedong, Datuk Mohd Naroden Majais madah, program pemansang enggau aktiviti komuniti dikena ngemansang sekeda sitak ba Dun Gedong enggau ngerapit kaul sereta semengat kerejasama entara peranak dia.

Berebak enggau nya ku iya, semua ketuai komuniti kelebih agi ketuai PBB ba renggat baruh sitak Dun Gedong patut merambu aktiviti ke deka diatur.

“Aku besedia meri sukung ba sebarang aktiviti ke deka diatur kelimpah ulih ngaul kerejasama peranak enggau ngetanka sukung rayat naggai PBB ba sitak Dun Gedong,” ku iya.

Iya mansutka jaku nya ba Aum Kaban Komiti PBB Pampang Gedong di Hotel Grand Dormani, ditu malam ensanus.

Ba aum nya, Mohd Naroden ti mega Kaban Kunsil Nengeri (Adun) N.26 Gedong  enggau Menteri Muda Dagang Entarabansa enggau Industri, Terminal Industri enggau Pemansang Orang Dagang madahka sida patut besedia nyeliahk sebarang jaku ari raban bekaul ngagai ketuai Perintah Sarawak kelebih agi Gempung Parti Sarawak (GPS).

“Kitai meseti besedia napi sebarang pekara kelebih agi lebuh pengawa Bepilih Besai Nengeri (PRN) ke deka datai.
“Nambahka nya, kitai apin nemu kemaya PRN deka diatu tang kitai raban PBB Gedong meseti besedia tumu ngambi napi PRN endang ngira sapa chalun tauka sapa enggau besatup (penyakal),” ku iya.

Suara Sarawak