MIRI: Parti Pesaka Bumiputera Bersatu (PBB) nya sebuah parti bechuanka penyerakup dikena ngemansangka Sarawak nyadi menua maju manggai taun 2030.
Nya mih jaku Sapit Menteri ba Opis Premier (Pengereja Pengawa, imigresyen enggau Matau Projek Sarawak) Datuk Gerawat Gala ti madahka nya prinsip dibai PBB ngujungka meruan diterima rayat Sarawak mai pemansang menua manggai taun 2030.
Ku iya, nya kebuah PBB terus diterima enggau menang ba penuduk Dun Mulu lebuh Pengawa Bepilih Nengeri Ke-12 (PRN-12) Sarawak.
“Nya kebuah, kitai mesti ngangkatka PBB nyadi sebuah parti iklusif lalu nadai pengawa berebutka kuasa entara tuai enggau renggat baru laban nya ukai budaya kitai,” ku iya nerang.
Gerawat mansutka jaku nya lebuh bejadika Aum Besai Pengari Tiga Taun Sekali Pampang PBB Dun Mulu di Eastwood Valley Golf and Country Club Miri, apin lama ke udah.
Ba aum nya, Gerawat udah dipilih nyadi Tuai Pampang PBB Dun Mulu ungkup renggat 2022 nyentuk 2025 ke disetuju semua seraya Osart Bilong dipilih nyadi Tuai Nembiak enggau Datin Easter Mujan Balan dipilih nyadi Tuai Indu PBB Dun Mulu.
Lebuh bejadika Aum Pengari Raban Indu PBB Pampang Dun Mulu, Gerawat madahka raban indu udah mayuh nyaup tim PBB enggau Gempung Parti Sarawak (GPS) ba PRN12 Sarawak ke dulu nyapai mayuh pemujur.
“Raban Indu PBB Dun Mulu mega udah mayuh nyaup PBB enggau GPS lebuh PRN12 Sarawak ke alai GPS diberi mandat baru enggau majoriti besai agi dibanding PRN-11 Sarawak,” ku iya nerang.
Nambahka nya, iya ngelalau semua pengari pampang, raban indu enggau nembiak Dun Mulu terus ngenanka penyerakup ungkup pengelantang mensia mayuh.
Sama datai Sekretari Politik Premier Sarawak, Petrus Igat Mathias, raban Exco Bapa, Indu enggau Nembiak PBB Pampang Dun Mulu enggau pengari ari 16 pati PBB Dun Mulu.
