PBS Long Kevok mujur ditumbuh

MIRI: Raban bansa Penan di Long Kevok, Layun nempa sejarah kediri laban udah setuju numbuhka Gerempung Bomba Volunteer (PBS).

Ketuai Zon 6 Opis Pengerara Api enggau Penyah Penusah (JBPM) Miri PgKB I Law Poh Kiong madah peranak Long Kevok chukup gaga pengudah mujur numbuhka PBS ba menua nya.

“Raban Penan di Long Kevok gaga sereta nerima PBS ungkup pengelikun genturung pendiau sida emou.

“Kelimpah nya, sida mega ulih mantu kampung bukai nyema bisi penusah angus nyadi seraya nganti Bomba ari Miri ti ngambi empat jam pejalai datai ngesah,” ku iya.

Poh Kiong bejaku munyi nya lebuh dirandau Suara Sarawak, kemari.

KENANG…Law Poh Kiong (duduk kanan) begambar enggau peranak Long Kevok pengudah Aum Protem PBS Long Kevok.

Tambah Poh Kiong, sida mega bisi ngatur licha pengelikun ngerara api ngagai peranak kampung maya nya.

“Urung bulan Mei ti udah, maya bisi penusah angus ba Long Kevok dan Long Meraan peranak Penan udah mantaika penyikar enggau pengelandik mantu ngerara api nyadi siti jasa besai ngagai kami,” ku iya.

PBS Long Kevok digaga nengah Aum Protem PBS Long Kevok ti diketuai Tuai Kampung Lucas Seman kena 3 Ogos tu tadi.

PBS tu keterubah digaga bagi peranak Penan di Sarawak dalam mantu ngerara api ba renggat tumu.

PBS Long Kevok deka meri servis ngagai bagi menua Layun ti datai ari Kampung Long Kevok, Long Leng, Long Urang, Long Liwok enggau Long Nan.

Aum numbuhka PBS nya mega disereta Pemesai Bagi Menua, Opis Pelilih Telang Usan Baru Tai, Ketuai JBPM Marudi Maureen Sim lalu dikemataka Penghulu enggau Tuai Kampung sitak Layun.

Nitihka Poh Kiong, diatu ba Bagi Menua Miri bisi 11 PBS udah ditumbuh nyengkaum Long Kevok ari 48 PBS di Sarawak.

“Ba Miri PBS udah ditumbuh di Batu Niah, Bekenu, Marudi, Piasau, Entulang, Luping Aji, Long Pilah, Long Bedian, Long Bemang, Bario enggau Long Kevok ti agi dalam proses rejister,” ku iya.

Dulu agi ari nya, Poh Kiong enggau tim iya ngaga Pematih enggau Simulasyen Pengkalan Mua bagi napi penusah bah di Long Bemang sepengelama dua hari iya nya 1 enggau 2 Ogos.

Poh Kiong madahka Long Bemang dipilih laban peranak dia ngempu perengkaguna ti pemadu manah enggau bekerejasama.

Pematih enggau simulasyen tu ngangkatka Long Bemang nyadi pengkalan mua dikena nyimpan bekal pemakai bagi sitak Sungai Tutoh Apoh ti selalu bah enggau tusah dituju tim penyelamat.

Sama datai maya pematih enggau simulasyen diatur Adun Telang Usan Dennis Ngau.

Suara Sarawak