SIBU: Presiden Parti Demokratik Progresif (PDP), Datuk Seri Tiong King Sing minta kaban kaban Parti Rakyat Bersatu Sarawak (SUPP) anang kelalu nitih pengasai ati beduduk ari pengelenyau penuduk Kunsil Nengeri (Dun) N.52 Dudong ngagai PDP.
Chalun Dudong nya mega ngarap enggau minta peranak sereta semua tim SUPP di sitak nya terus meri sukung ngagai Gabungan Parti Sarawak (GPS).
“Aku minta semua kaban SUPP anang kelalu nitih pengasai ati lalu kitai patut datai meri kerejasama nengah siti tim lalu ngereja pengawa pemadu manah ungkup Dudong.
“Nyema aku siku ketuai, tauka presiden sesebengkah parti lalu aku nitihka pengasai ati lalu nguji ngereja utaki ke ngelaban parti bukai nya deka meri empas ke enda manah,” ku iya.
Iya madah munyi nya maya dirandau ba aum pemberita bepalan ba Opis Servis PDP Dudong di kemari.
Ku Tiong, nadai jaku ‘kerusi asal’ ba pengawa bepilih besai nyadi sida ulih ngengkah barang sapa chalun ba Dun ke udah diperunding.
