PdP norma baru agi jelungan

KUCHING: Perengka guna arus penyambung nyadi pugu penanggul lebuh ngemeranka daya idup (norma) baru kelebih agi ba pekara pelajar berindik ari atur nagang Covid-19 ari ngerekai.

Ketuai Pemesai Eksekutif Kuching Skills College, Novert Sullang, madah, pemansang teknologi ti enda sebela ungkup nembiak ba Sarawak ngasuh mayuh perambu PdP jelungan.

Kebuah pia ku iya, pelajar kemaya hari tau dikumbai bepanggai ba takah digital ke alai sambung internet ke sama peneras tauka nadai nerima terus.

“Bala nembiak ke nadai nerima sambung internet rugi besai laban enda ulih nitihka singkang bala bakih bukai ba pekara pelajar lalu pekara tu mai pangka besai ngagai pengidup sida jemah.

“Ambika chunto baka bala nembiak kami ke baru rejister diri belajar ba Kuching Skills College (KSC) taun tu apin ulih belajar baka selama sekumbang Atur Tagang Pejalai (PKP) diterit.

Novert Sullang

“Piak kolej napi pemar ngatur kelas online laban tebal agi sida tu diau ba kandang menua pesisir enggau menua ulu ti nyau deka nadai nerima sambung internet.

“Nyentuk sekeda nembiak nyau sebelah tisi pagar sekula enggau ladang sawit begigaka arus internet,” ku iya lebuh dirandau Suara Sarawak.

Novert nimbal penerang dipansutka Menteri Pelajar, Sains enggau Pansik Teknologi, Datuk Sri Micheal Manyin Jawong ti madahka pengawa belajar tauka kelas chara online bedau engkeman dipejalai ba Sarawak laban lebih ari 50 peratus nembiak nya nadai perengka guna arus penyambung.

“Jerita Colyana Rebia ari Skrang belajar ba tisi pagar Sekula Primari (SK) Nanga Menjuau enggau Martha Richard ari Lubok Antu belajar ba ladang sawit.

“Tu sekeda ari jerita sinu ti mandangka bala nembiak menua pesisir randakka penemu enggau pemansang dikena ngulihka pengidup ke menyana agi jemah,” tandu Novert.

RANDAKKA PEMANSANG… Martha sanggup ngelawa ladang sawit ngulu kelas online.