PdP patut diadu seriris enggau daya idup chara baru

KUCHING: Opis Menteri Pelajar Malaysia (KPM) dipinta nelebaka diri enggau chara ngajar enggau belajar (PdP) seriris enggau daya idup chara baru, pia ku Sapit Kepala Menteri Tan Sri James Jemut Masing.

Ku iya, pekara tu beguna amat ngambi ulih nyeliahka mayuh agi nembiak kelebih agi ba menua pesisir ti napi penanggul arus penyambung ari tinggal pelajar.

“Pandemik Covid-19 tu udah ngeruga pelajar bala nembiak ba selampur menua enggau Atur Pengawa Standard (SOP) ti dikeluarka Opis Menteri Pengerai Malaysia (KKM) udah ngenataika penusah ngagai nembiak nurun ke sekula.

“Ba taun 2020, jam mayuh tebasau pia aja kelebih agi nembiak ti besekula ba menua ulu ketegal penanggul arus penyambung,” ku iya nerang.

Masing madah, taun 2021 deka nukar taun 2020 nentuka nembiak ulih belajar baru nyema Covid-19 tu ulih ditagang.

Nya alai ku iya, KPM mesti nusun baru timpuh kemisi sekula enggau kemisi penggal ngambi nembiak ba menua ulu ulih belajar.

Iya madah, KPM enda patut neruska taga baka dalam kalender akademik taun sebedau tu lebuh bejalaika tiga kemisi semester setaun nyengkaum hari besai.

“Nya kebuah, KPM mesti nusun baru taga sida laban pandemik Covid-19 ukai timpuh ke pandak.

“Aku berasai asa lebuh nemu berita KPM terus bejalaika taga besekula baka nadai utai nyadi di menua tu,” terang Masing.

Masing madah, sida mesti nitihka taga nya lebuh taga kemisi sekula nitihka kalendar KPM.

“Pelajar nembiak deka tejanggal udah tu semina ketegal Covid-19 enti sema KPM enda nelebaka diri enggau chara baru,” ku iya ti mega Adun Baleh.

Suara Sarawak