PdPR ari rumah di menua pesisir mayuh tejanggal – DTTAS

KUCHING: Gerempung Pemikir Dayak Sarawak (DTTAS) minta perintah jampat agi mutarka penanggul arus penyambung ba menua pesisir ngambika proses Ngajar enggau Belajar ari Rumah (PdPR) ulih dipejalai enggau meruan.
Sapit Presiden DTTAS Edward Awan madahka gerempung sida entara gerempung ukai dikuasa perintah (NGO) ti balat ngemeratka pekara pelajar di menua tu kelebih agi bansa Dayak.
“Isu PdPR nyadi siti penyadi nasional kenyau seminggu ke udah lalu laban ngaul raban B40 enggau M40 ti balat kena pangka pengerekai Covid-19.
“Penanggul tu ayan laban Sarawak napi pemar ngulihka akses tali arus sereta pengurang perengka teknologi dikena nembiak enggau pengajar belajar ti ngujungka penanggul nya nating apai indai,” ku iya bejaku dalam siti penerang media, sehari tu.
Ku Edward, pekara nya meri penanggul besai ngagai proses PdPR sepemanjai timpuh Atur Mindah Betagang (PKP) lebuh pengerekai Covid-19.
“Agi mayuh nembiak ba menua pesisir enda ulih nitihka PdPR laban arus internet enda kuat kelimpah napi penanggul sekula repuk enggau kurang perengkaguna belajar.
“Kami ngansak GLC enggau MNC ejensi ti bekaul enggau komunikasyen nunjukka ulah ngambi peduli (solodariti) meri pakej internet enggau telefon pintar ba rega ti patut engkeman dikena PdPR kelimpah meri data nadai sekat ngulihka internet.
“Opis Menteri Komunikasyen enggau Multimedia mega patut ngaga tiang pemanchar telikomunikasyen ti ulih mekalka internet ngagai palan ti mar ngulihka line.
“Opis Menteri Pelajar (KPM) patut udah besedia tumu mutarka penanggul komunikasyen pelajar tu maya pengerekai Covid-19 di menua,” ku iya.
Iya madahka PdPR ti dipejalaika perintah udah ngujungka mayuh nembiak enda ulih nitihka pelajar laban apai indai enda ulih meli line internet ke rumah.
Taja pia, ku iya bala pengajar terus bebendar nentuka semua nembiak ba menua tu ngulihka pelajar ti meruan.
Ku iya, taja perengkaguna ba sekula nadai meruan sereta jauh tinggal tang bala pengajar terus besemangat mantu nembiak sida.
Iya andalka enti perintah nyendiaka perengkaguna pemun ti lebih manah, pengajar enggau nembiak deka ulih nambahka kuliti PdPR sida.

Suara Sarawak