ARTIKEL

PdPR enda asai belajar betimpai mua

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

SARATOK: Siku pengajar SK Nanga Ajau, Betong Roslind Jerman madah pemar tetap bisi ditapi sekumbangka bejalaika PdPR lebih agi ngagai bala pengajar, nembiak enggau apai indai.

Ba bala pengajar, laban utai tu baru ke alai sida nadai latih ke chukup diberi dikena bejalaika PdPR enggau engkeman.

“Pengajar enda ulih meri jaku peransang tauka motivasi ngagai nembiak baka maya belajar betimpai mua dalam kelas.

“Bisi sekeda apai indai enda ulih nyendiaka kereban ti chukup baka data internet enggau telefon pintar dikena anak sida.

“Tu mega ditambah enggau penanggul arus internet ke apin menyana di menua pesisir,” ku iya lebuh meri timbal bekaul enggau peneleba ngajar nitih chara baru tauka nengah PdPR.

Nangkan ke nya, ku Roslind penanggul baka tu meri pangka ti enda manah ngagai bala nembiak ti belajar nengah PdPR.

“Kebuah pia laban enda semua sida ulih nitihka kelas PdPR. Bisi nembiak ke lubah nangkap pekara diajar pengajar deka terus tinggal laban peluang bejaku enda asai belajar betimpai mua dalam kelas.

Ba penemu siku agi pengajar ke ngajar ba Kolej Tingkatan 6,Saratok Geraman Jamit madahka kelimpah ari penanggul nadai arus internet, PDPR tu mega napi pemar bukai.

“Ambika chunto, pengajar tusah deka nerangka siti-siti topik enggau nyentuk dibanding enggau belajar betimpai dalam kelas.

“Ba aku siku, ngajar nengah PDPR enda tentu ngemantupka ati sereta sigi jauh bebida enggau maya ngajar dalam kelas laban ‘Interaksi’ enggau nembiak enda tentu lanchar.

“Ulah nembiak maya PDPR mega tusah diperati dijaga laban jauh ari pengajar,” ku iya.

Taja pia, ku Geraman maya kitai dituntung penusah ketegal pandemik Covid 19, PdPr tetap dititih enggau naka ulih ngichaka bala nembiak enda tinggal pelajar.

Geraman Jamit

 

Roslind Jerman

BERITA LAIN

BERITA TERBARU