Pebedas ditumbuh asil gempung penemu nembiak Dayak

SIBU: Penumbuh Gerempung Raban Nembiak Dayak Sarawak (Pebedas) bepun ari segempung penemu bala nembiak Dayak.

Penyanding Penemu Mendam Pebedas Daniel Batin madah, ari saum penemu, beserakup sereta bebasaka pengidup enggau bida jaku etnik Dayak ngepunka Pebedas mujur bisi nyentuk ke diatu.

“Pebedas ditumbuhka raban nembiak Dayak ungkup nembiak Dayak empu.

“Ari penyerakup mega nyadi pelasar pengering ngagai Pebedas,” pia ku iya madah maya dipebasa datai bejadi engawa nyuka Surat Chiri Kaban Kaunsil Besai Pebedas 2019-2021 enggau pengawa nyuaka Anugerah Prestasi Cemerlang Bintang Pebedas 2019 kena hari Enam tadi.

Dulu agi ari nya, Aum Besai Ninting Taun Pebedas mega diatur ti ditangkan enggau pengawa milih komiti baru Pebedas renggat 2019-2021.

Daniel ti mega Ex-Presiden Pebedas madah, maya hari tu endang mayuh gerempung ukai dikuasa perintah (NGO) raban nembiak ditumbuhka tang enda 100 peratus nentuka nyadi pelasar nembiak Dayak ngerembaika runding inovasyen sida.

Iya mega maya tu ngelalau raban Pebedas semampai ngemeranka ulah beserakup dalam gerempung lalu nyeliahka penemu enda manah baka ngarapka balas nyengkaum salah guna penuduk.

“Kitai ngarapka Pebedas tu seruran chakah nambahka raban baru lebih agi sida ke beumur baruh 30 taun.

“Kebuah pia laban kitai deka ngembing sida nyadi orang ke megai gerempung tu ila seririh enggau Akta Belia bagi umur baruh 30 taun berengkah dipejalaika taun 2022 ila,” ku iya madah baru.

Bekenangka pengawa bepilih komiti baru Pebedas, Daneil madahka diri berasai temegah ati laban ari pemujur pengawa nya mandangka gerempung ngembuan raban ti beserakup penemu.

“Pemujur pengawa tu nyadi kelai ti terang mandangka Pebedas mengkang engkeman ungkup raban nembiak Dayak serata Sarawak,” pia ku iya.

Ba pekara bekau, Presiden Alexander madahka Pebedas sebengkah gerempung Dayak di Malaysia ti ngemeranka penyerakup macham etnik di Sarawak.

“Pebedas bebasaka etnik kelimpah ngelaluka raban ti ngembuan pengerindu ke enda sebaka datai ba gerempung tu lalu ngerekaika pengerindu beserakup nembiak Dayak nengah program bekaul baka pemansang nembiak ari lumba enggau main, pelajar, main asal sereta dagang,” ku iya nengah penerang.