Pedagang nyungkak ekonomi nengeri

MIRI: Pedagang endang tiang pemun nyungkak ekonomi enggau pengelantang sesebuah nengeri.

Menteri Muda ba Opis Kepala Menteri (Pekara Korporat enggau Unit Komunikasi Awam Sarawak) Abdullah Haji Saidol madah, tu nyata dipeda ba jeman ekonomi digital diatu iya nya bala pedagang berandau terus enggau penguna ari serata dunya.

Kenu ku iya, Perintah Sarawak udah lama nemu pekara tu lalu sida bebendar nyukung sereta merandang pedagang ba menua tu.

Iya madah munyi nya rambau Pengerami Nutup enggau Nyuaka Perais ungkup Program Youth Co:Lab Malaysia ditu kemari.

“Inisiatif ke dipejalaika perintah nyengkaum ngungkupka belanja ngagai pedagang sereta nyendia latih beguna amat dikena nambahka pengelandik sida.

“Nengah kerejasama enggau Palan Inovasyen enggau Kreativiti Global Malaysia (MaGIC) sereta bakih kunsi Sarawak iya nya Turu Ekonomi Gagasan Anak Bumiputera Sarawak (TEGAS) sereta Agenda Lokal Miri 21, Youth CO: Lab Malaysia tu mujur diatur dikena meransang, nyungkak, enggau negapka pengelandik nembiak kelimpah meri sukung tumu ngagai sida,” ku iya.

Abdul Saidol madah, Perintah Sarawak seruran meransang pengawa kunsi entara perimtah enggau kompeni nengah inisiatif ke ulih meri pemaik ngagai rayat mayuh.

Program Youth Co:Lab diatur Program Pemansang Serakup Seati Dunya (UNDP) begulai enggau Citi Foundation enggau MaGIC.

Taun tu, Youth Co: Lab Malaysia diatur ba dua bengkah palan iya nya Cyberjaya, enggau Miri sepanjai November enggau Disember.