SARIKEI: Bepegai ba sempekat tuju enggau juluk Serakup Dayak Sarawak (Pedas) Pampang Sarikei meransang rebak baru begulai ngetan hak enggau ngintu pengelantang raban bansa Dayak menua tu.
Nitih ku penerang ari Ketuai Pemadah sida, Aldrich, bisi empat batang pekara dipejurai rambau Aum Besai Ngenyit (EGM) Pedas Pampang Sarikei, pagi tadi.
Ku iya, entara pekara nya nyengkaum kelas seni kuntau ke deka diajar Guro Colin tauka Iskandar nentuka seni ngetanka diri nya ditampung ngagai rebak baru.
“Kami udah ngelangkar pejalai aktiviti dataika ujung taun 2019 kelimpah matak mayuh agi kaban baru.
“Kami mega bisi ngatur program lagu karaoke di Rumah Asap, Nyelong ditu, diempu siku ari kaban Pedas dikena ngiga belanja serakup.
“Pekara pelajar bala anak mega nyadi fokus besai kami lalu pengawa meri bantu ngagai raban ti dituntung penusah ngenyit baka angus, bah enggau rabat endang deka dibantu baka selama,” terang iya.
Berebak enggau aum nya, Lugat udah dipadu nyadi Ketuai Pampang ke baru, Dawie nyadi sapit sereta nyadi penyanding penemu seraya Unja Juni megai pangku pengawa sekretari enggau Aziman sapit iya.
Nangkan nya, Steward Sedah nyadi tukang wang seraya Maria Ligi enggau Stephen Utot bela dikeandal nyadi sapit tukang wang ke disaup bala bukai ti udah dipadu gawa.
Aum nya mega udah dikemata lalu ditukuka Mandal Presiden Pedas, Pete Bujang.
