Pegawai Perubat KKM sehari tu bekejang ke Long Jeeh ngambi peresa Covid-19

MIRI: Pegawai Perubat Opis Menteri Pengerai Malaysia (KKM) diperambu bekejang sehari tu ke Long Jeeh, Baram ngena bilun engkabang pukul 8.30 pagi tadi.
Menteri Perengka Pengangkut Sarawak, Datuk Lee Kim Shin madahka servis bilun engkabang dikena beduduk ari timpuh pejalai pengelama tujuh jam ngagai rumah panjai nya enti ngena jalai darat.
“Kebendar, sida diperambu berangkat ngagai Long Jeeh kemari tang ketegal bisi penanggul bukai, kami merambu baru sehari tu,” ku iya lebuh dirandau, ditu kemari.
Kim Shin ti mega Menteri megai tanggung pengawa Komiti Penyangga Penusah Bagi Menua (JPBB) Miri madahka bilun engkabang nya mai dua iku lutur enggau pegawai perubat sereta siku indu misi.
“Bisi dua buah bilun engkabang deka ngambi kereban beperesa Covid-19 enggau pegawai KKM deka terebai pukul 8.30 pagi ngena bilun engkabang ari Kuching,” ku iya.
Adun Senadin nya madahka servis bilun engkabang ngagai Long Jeeh beguna amat ngambi KKM ulih meresa peranak dia pengudah ti ngerikod dua kes positif Covid-19 apin lama.
Sapit Speaker Dun, Datuk Gerawat Gala ti minta ngena bilun engkabang ngambi mai staf KKM ngagai genturung pendiau.
Gerawat udah telefon ngagai Kim Shin ngambi ngena servis bilun engkabang ngelawa genturung pendiau nya meresa peranak dia lalu ukai ngasuh peranak ke Miri.
Iya mega udah telefon ngagai Kaban Parlimen Baram, Anyi Ngau ngambi nangkan peranak dia ngurung diri dalam bilik dataika pengawa beperesa nya tembu lalu pemutus udah ditemu.
Semua lima blok rumah panjai ba Long Jeeh Baram udah diempang enggau enda ulih mindah ke bukai pengelama 14 hari.