SIBU: Operasyen servis bot ekspres Sibu-Sarikei-Tanjung Manis-Kuching diketuka sementara, nyentuk ke siti timpuh ti deka dipadah ila, ku Pemangku Pengatur Kaunsil Sungai Sarawak (SRB) Lt (Rtd) Ding Tiew Wong.
Nitih ku iya, pengawa ngetuka sementara operasyen bot ekspres tu bepun ari 4 November tu tadi.
“Pejalai bot ekspres ti beoperasyen entara Sibu-Sarikei-Tanjung Manis-Kuching (pulai mansang) udah diketuka sementara, berengkah ari 4 November nyentuk ke siti timpuh ti deka dipadah ila, pengudah mengeri Kuching nyadi Zon Mirah Covid-19,” ku iya madah ngagai pengarang berita.
Sebedau tu, Chairman Komiti Penusah Ngenyit Nengeri (JPBN) Datuk Amar Douglas Uggah Embas ba siti penerang media madahka pemindah entara mengeri patut bisi surat pemendar ari polis, kelebih agi ungkup sida ti deka mindah ari Kuching ngagai mengeri bukai.
Ku Uggah, Atur Mindah Betagang Belebas (PKPB) berengkah dipejalaika ba mengeri Kuching kena 9 nyentuk 22 November tu ila.
Ku iya, JPBN netapka pemutus tu berindik ari kes Covid-19 ti majak niki ba kandang Mengeri Kuching sereta pengudah berundingka pekara nya enggau Kepala Menteri Datuk Patinggi Abang Johari Tun Openg.
Ungkupka rikod, jam bot ekspres Sibu ke Kuching meleka iya nya pukul 11.30 pagi, lalu Kuching-Sibu kena pukul 8.30 pagi.
Dulu agi ari tu, servis bot ekspres Kuching-Sibu-Kuching udah diketuka ari 1 nyentuk 14 Ogos ketegal atur nagang pemindah mensia mayuh entara zon di Sarawak, berindik ari kes Covid-19 ti ngenyit niki lebuh nya.
