Pejalai entara nengeri, pelilih menua dikemendar

KUCHING:  Komiti Penyangga Penusah Ngenyit Nengeri Sarawak (JPBNS) ngemendarka pejalai entara nengeri ke Sarawak enggau pejalai entara pelilih menua dalam Sarawak berengkah sehari tu (10 June).

Sapit Kepala Menteri ti mega nyadi Chairman JPBNS Datuk Amar Douglas Uggah Embas madahka rayat ba nengeri tu dikemendar bejalai entara pelilih menua seriris enggau pemutus dibantaika Perintah Besai apin lama tang nitihka Standard Atur Pengawa (SOP) di Sarawak.

Kelimpah ari nya ku iya, rayat Malaysia ke diau di Semenanjung Malaysia, Sabah enggau Labuan dikemendar tama ke Sarawak, enda ibuh minta pemendar nengah JPBNS lalu meseti diperesa PCR tiga hari sebedau ke Sarawak.

“Taja pia, sida meseti nitihka SOP ke udah diterit berengkah 10 June nyengkaum matak aplikasyen MySejahtera lalu ngisi pom pengerai (e-Health declaration) ba website JPBNS.

“Bala temuai meseti ngambi sampel PCR pengudah datai ba pintu penama nengeri baik nya ari langit, darat tauka tasik lalu matak aplikasyen Covid Trace Sarawak enggau Qmunity,” ku iya madah ba aum pemberita pasal Covid-19 di Begunan Lama Dun ditu, tadi.