Pejalai Matau Menua Bukit Sadok, 27-28 Sept tu

KUCHING: Mensia mayuh diperansang nyereta Pejalai Matau Menua Bukit Sadok 2019 deka diatur kena 27 enggau 28 September ba Rumah Panjai Jambu Kerampak, Layar, Betong.

Program diatur Komiti Dagang Temuai Bagi Menua Betong (DTTG) kerejasama sekeda ejensi perintah, gempung ukai dikuasa perintah (NGO) enggau Komiti Pemansang enggau Pengelikun Genturung Pendiau (JKKK) Rumah Panjai Jambu Kerampak.

Pejalai Matau Menua Bukit Sadok tu program ninting taun lalu udah direjister enggau dipasuk ba dalam kalinda Dagang Temuai Nengeri Sarawak.

Batang tuju pejalai tu deka ngangkatka Bukit Sadok nyadi pematak dagang temuai, mandangka penyelai rumah panjai enggau gaya idup komuniti dia kelimpah ngangatka isi nengah pelanda enggau niki bukit.

Program tu mega mansutka penatai pemisi mensia mayuh ba kandang menua Ulu Layar ba pengawa mandangka main asal enggau ngangkatka dagang asil pengelandik sida.

Program dua hari tu bisi ngerintaika mayuh aktiviti ngagai bala penyereta lebuh ba hari keterubah sida deka bepeluang nyereta Pekit Nulis Karang Panglima Rentap 2019, Lumba Rayat enggau Pengawa Bejual sereta Malam Main Asal Jambu Kerampak.

Nambahka nya ba hari kedua, bala penyereta bepeluang nyereta Pejalai Niki Bukit Sadok, Pelanda Bukit Sadok, Explorace Bukit Sadok enggau Pekit Fotografi Bukit Sadok.

Berebak enggau nya, mensia mayuh ke bisi ati nyereta program enggau aktiviti diatur beserimbai enggau pejalai tu enggau Pekit Nulis Karang tau telefon ngagai Bensen Damu ba lumur 019-8942396 lalu Program Malam Main Asal Jambu Kerampak tau telefon ngagai Evie Michelle ba lumur 014-886 1638.

Ba Pekit Ngambar, sida tau telefon ngagai Hasbollah (012-8581231), Bukit Sadok Fun Walk tau telefon ngagai Florence Bulan (013-2857994), Bukit Sadok Nature Challenge telefon ngagai Amy(013-8006109) enggau Explorace Bukit Sadok telefon ngagai Kaunsilor Horace (019-4398218).

ARAM SAMPAL DATAI… Mensia mayuh diperansang ngulu Pejalai Matau Menua Bukit Sadok 2019