Pejalai projek RTP Dun Kabong ngemantup ati

KABONG: Dua buah projek ba baruh Projek Transformasyen Menua Pesisir (RTP) Dun Kabong deka tembu enda lama agi.

Projek tu mungkur Projek Ngaga Baru Masjid Lama Kabong enggau Nyeleti Perengkaguna Palan Ngelantang Ati Tanjung Kembang Kabong, ku Adun iya, Mohd.Chee Kadir.

Iya madah chukup tepantup ati enggau pejalai projek dua bengkah nya jam diatu ke beungkus RM800,000.

“Ari perati penuh, aku tepantup ati sereta lantang ati meda pemansang projek (dua bengkah) nya diatu.

“Taja tadi Kunteriktor bisi nelai aku madahka sida bisi penanggul ba gaya mua hari (suah ujan) ti ngujungka bala pengereja pengawa iya (Kunteriktor) lubah mimit gawa.

“Tang nyentuk seharitu pejalai projek tu agi nitihka langgur udah ditetapka piak ejensi bekaul (MDS) ti diberi tanggung pengawa ngemata projek tu,”ku iya nerang ngagai pemberita pengudah tembu pengawa ngabas palan projek, nya kemari.

Pemansang projek dua bengkah tu diatu manggai 40 peratus tembu sereta disadang tembu penuh bulan March 2020.

Penembu projek tu ila disadang ulih mutarka penanggul sekut endur besembiang ditapi peranak Kampung Lama lau pemisi perengkaguna ke menyana ba Tanjung Kembang Kabong tau meri pengelantang ngagai mensia mayuh tauka temuai ke bisi raun ngagai palan nya.

Sama datai nyempulang pejalai Chee Kadir, Pemangku Sekretari Kaunsil Pelilih Saratok,Bilong Engkas enggau Staf Opis MDS,Tinggom Bat.