Pekara MA63 patut dibai ngagai kort

Suba dipegai BN kitai ditagang bejaku, tang diatu kitai ulih ngatika diri

KUCHING: Enti hak Sarawak bekaul enggau Sempekat Malaysia 1963 (MA63) enda diberi pulai, pekara tu patut dibai ngagai piak kort.

Kaban Parlimen Santubong, Datuk Seri Wan Junaidi Tuanku Jaafar madah enti hak enda dipulaika nitihka ke pinta Perintah Sarawak, pekara nya patut dibai ngagai kort ngambika sida ulih meri saut bekaul enggau penanggul kitai.

“Kitai enda ibuh berandau pasal hak agi bekaul enggau MA63 tu laban hak nya endang udah bisi, tang diatu kitai patut irau baka ni piak ari Semenanjung Malaysia ngamatka pekara nya.

“Seagi ulih kitai sigi nagih hak Sarawak, tangenti kitai alah ba pengawa bepilih nengeri (PRN) ila lalu dipegai penyukung ubah tu ba renggat perintah besai nyadi semua ke dipinta kitai bekaul MA63 tentu puntan magang,” ku iya.

Datuk Seri Wan Junaidi Tuanku Jaafar

Wan Junaidi madah munyi nya lebuh dirandau ba pengarang berita sentang Licha MA63 Renggat Parlimen Santubong di Palan Konvensyen Penview ditu, kemari.

Nangkan nya, ku iya, iya meretika sida MP patut nyukung nama-nama pekara dipadah piak Perintah Besai.

“Suba, agi rambau dipegai perintah Barisan Nasional (BN), kitai endang baka ditagang bejaku tang diatu, kitai udah lepas lalu ulih ngati kediri.

“Aku nemu enti sida MP nyukung Perintah Besai laban nya siti tanggungpengawa kolektif sida tang nya ukai reti sida perintah Pakatan Harapan (PH) patut bejai sereta nuduh kitai enggau macham-macham,” ku iya.

Wan Junaidi madah sida semina ngetanka hak menua Sarawak ke udah lama lenyau tauka enda dikeingat dalam Sempekat MA63.

Bala MP Sarawak ke nyukung ubah rambau 9 April patut berunding enti sida agi taluk ngagai Sarawak, sida patut nyukung Perintah Sarawak, ku iya.

Seraya, ku Wan Junaidi, Sempekat MA63 enda ulih ulih dijapai diatu laban menua Sarawak 30 taun jauh tinggal ari menua Semenanjung.

Suara Sarawak