Pekara pelajar nembiak menua pesisir patut diperunding

MIRI: Kurang arus penyambung ba kandang menua pesisir ulih ngasuh nembiak tinggal pelajar kelebih agi sekumbang Atur Tagang Pejalai (PKP) tu enti nadai atur engkeman dikena mutarka penanggul tu.

Pia ku jaku Adun Telang Usan, Dennis Ngau ti ngarapka piak bekaul ngiga jalai baka ni nembiak ba menua pesisir ulih neruska pengawa belajar sekumbang PKP tu.

Dennis mega madahka diri irauka penanggul nya lebuh ngatur penemuai ngagai Long Lama apin lama, kelimpah limpang ngabas Sekula Sekondari (SMK) Long Lama enggau Sekula Primari (SK) Long Kevuk.

“Bala nembiak ba menua pesisir nadai arus penyambung baka nembiak ke diau ba mengeri lalu penanggul tu meri pemar ngagai sida napi peresa,” terang iya.

Iya madah, teknologi makin maju tang arus penyambung ba kandang menua ulu agi kurang ngujungka bala nembiak enda ulih bekenaka teknologi digital.

Berebak enggau nya, Dennis muji inisiatif dipejalaika Opis Menteri Pelajar (KPM) ngatur pengawa belajar ba rumah ngagai bala nembiak sekumbang PKP tu.

Taja pia ku iya, penyampau nembiak ba kandang menua ulu enggau kurang arus penyambung patut diperunding ngambika sida enda tinggal pelajar.

Kelimpah ari nya, Dennis mega ngingatka peranak Long Lama semampai nitihka atur PKP ngambi ngetanka pelilih nya nyadi Zon Gadung berindik ari pengerekai Covid-19.

“Kitai meseti bekerejasama enggau nitihka semua atur PKP ngambika Long Lama agi dirintai ba Zon Gadung,” ku iya nyemetak madah.

Suara Sarawak