Pekara pengerai runding deka dipejurai

KUCHING: Aum Besai Pengerai Runding Sarawak 2020 Ke-6 deka diatur berengkah 1-3 April tu di Hotel Imperial, ditu.

Direktor Hospital Sentosa ti mega nyadi Chairman Pengatur pengawa nya Dr. Rosliwati Md. Yusoff madah, tuju aum besai nya meri perati ngagai pengelantang enggau ngubat sida ke ditepan sakit runding kelebih agi Sepital Sentosa Kuching.

“Aum besai tu siti ari chara kami ngelakuka pengawa sedarka pemesai reti nyaga pengerai runding ngagai komuniti ba menua tu.

“Nya alai kami deka mai mensia mayuh sedarka pemesai reti aum tu ti deka mantaika mayuh penemu pasal sakit runding tu,” ku iya.

Ba hari keterubah enggau kedua aum besai nya deka diisi enggau tujuh plenari enggau semilan simposium pasal pengerai runding ari raban bepenau enggau pengelicha bekaul.

Nangkan nya ku iya, empat bengkel pasal pengerai runding mega deka diatur ba hari ketiga aum besai nya.

“Empat iti bengkel nya deka mungkur empat batang jurai bebida ti deka meri penemu senentang pengerai runding kelebih agi pasal orang ke nyaga sida ke bisi penanggul runding enggau pemar nyaga orang tuai ke udah babu.

“Kelimpah ari nya, bengkel tu mega deka bejuraika chara nagang ulah munuh diri ba sida ke bisi penanggul runding sereta meri penemu ngagai apai indai ngambika ulih nyeliahka penanggul tu nyadi,” ku iya.

Dr. Rosliwati madah munyi nya ba aum pemberita pasal Aum Besai Pengerai Runding Sarawak 2020 Ke-6 enggau rambai jaku Embracing Mental Health Inclusivity: Towards Wellnes and Revovering di Sepital Sentosa ditu tadi

Suara Sarawak