Pekebun buah deka terus dibantu

“Tu nyengkaum pengawa meri geran, pinjau modal nyungkur tanah kelimpah ari bantu teknikal enggau lalau profesional.”

SERIAN: Perintah Sarawak sedia mantu raban pekebun buah ti bisi penau negerembaika asil tanam sida.

Sapit Kepala Menteri Datuk Amar Douglas Uggah Embas madahka mayuh macham program udah dilanggur perintah dikena mantu sida tu.

“Tu nyengkaum pengawa meri geran, pinjau modal nyungkur tanah kelimpah ari bantu teknikal enggau lalau profesional.

“Kelimpah ari nya, kami deka numbuhka palan ngumpul, proses enggau mungkus (CPPC) dikena mantu sida dalam pengawa makit produk,” ku iya.

Iya madah munyi nya lebuh nemuai ngagai Semukoi Agro Farm Sdn Bhd di Kilometer 79, Jalai Serian-Sri Aman ditu, kemari.

Kebun ti nama entekai Jipun (Japanese Rock Melon) nya diempu siku pedagang agro Iban iya nya Terence S. Landong ti ngemujurka kebun nya begulai enggau sida sebilik.

Uggah temegah enggau penyampau sida pedagang bumiputera ti mayuh ngaul diri dalam industri tu.

“Sida bejalaika tanggungpengawa sida dalam ngemenuhka juluk perintah ti deka nyadi pengekport pemakai enggau produk pemakai manggai 2030.

“Sida tu ulih nyadi sebagi ari penyambung kitai dalam beranakka puku lalu ngarapka sida ulih nitihka pejalai pedagang bukai ke udah mujur ngulihka chap MyGAP enggau ke bukai dalam mantu produk sida rembus ngagai makit luar,” ku iya.

Uggah mega madahka deka bisi guna dalam nambahka penyampau pedagang dalam pengawa betanam betupi tu ti ulih mantu ngemansang sereta mansutka mayuh bekal leka buah.

“Tu deka nyadi dagang ti besai enti mayuh orang ngaul diri dalam industry tu,” ku iya.

Iya meri tabi basa ngagai Terence ti ngaul diri dalam pengawa betanam betupi moden ngena sistem fertigasyen lalu udah nya ngena hidroponik.

Nitihka penerang ari Terence, entekai siti ari produk komersial ba tanah pemesai lima hektar ti diperambu iya deka ngerembai nitih renggat.

“Kami mega nanam strawberi, chabi, lia enggau mayuh bengkah buah ke bukai.

“Tuju kami iya nya deka numbuhka siti taman agro ti ulih narit ati penemuai agro kelimpah ari nyadi siti kebun kontrak.

Ku iya, kena 7 March tu tadi sida nanam renggat keterubah 5,000 entekai lalu ba bulan Mei tu tadi mujur ngetau 6,000 kilogram buah nya.

Nya lalu ditampung enggau renggat kedua enggau penyampau 5,300 entekai lalu mujur ngetau 8,000 kilogram ba bulan Ogos tu tadi.

Ku iya, purata pemerat buah nya manggai dua kilogram lalu pemadu berat iya nya tiga kilogram.

Iya mega madahka ba September tu tadi, bisi 5,300 buah udah ditanam lalu asil ketau keterubah tembu pun bulan tu tadi.

“Pelin kami ke dudi hari iya nya deka nanam 50,000 utai tanam lalu ngemanah sereta ngemesaika kebun tu.

Taja pia ku iya, mayuh pemar ditapi sida dalam bejalaika pekara nya nyengkaum gaya hari ti enda tentu, ungkus ba baja ti majak nambah, nutrisi, leka buah enggau ke bukai nyengkaum kuasa karan ti enda chukup sereta bekal ai.

Siti ari juluk iya mega iya nya deka ngulihka MyGAP certification.

Suara Sarawak