Pekebun lada ulih nyual produk terus ngagai Saraspice

PADAWAN: Opis Menteri Pengawa Bekebun enggau Komoditi meransang pekebun lada nyual produk sida terus ngagai piak bekaul.

Sapit Menteri Pengawa Bekebun enggau Komoditi, Willie Mongin madah, apin lama Opis Menteri udah numbuhka serikat Saraspice Sdn Bhd ungkup nyual produk lada ngagai sektor dagang baka hotel, restoran, katering nengah online enggau ke bukai.

Ku Willie, pekara tu deka nikika rega lada lebuh peminta lada majak nambah laban diatu rega lada menua kitai labuh ketegal pemanah kualiti lada ari menua bukai kelebih agi ari menua Vietnam.

“Nengah Aum Besai Lada Entarabansa, aku udah ngasuh Sekretari Bagi Menua ba pekara lada enggau koko ngambi berandau enggau menua pemansut lada ngambi ngurangka pemansut sida ba produk tu.

“Kebuah pia laban tu sebagi ari pengawa begulai nyemelaka rega lada lalu ulih diterima pekebun lada ke alai sida ulih gawa ngulihka untung.

“Aku nemu, sida napi penusah ngetanka pengawa nyual lada laban rega komoditi kelalu baruh,” ku iya ba aum pemberita pengudah ngabas kebun lada Betis Simam ba Kampung Jambu, ditu tadi.