BINTULU: Deligit Raban Bekuasa Kaunsil Pekebun Mit Getah (Risda) Sarawak udah ngatur penemuai ngagai Palan Betanam Betupi Putra (PPP) Kampus Universiti Putra Malaysia Bintulu (UPMKB), kemari.
Pejalai nemuai seraya gawa nya betuai ke Direktor Risda Sarawak, Shaharuddin Saberi lalu disempulang pegawai Risda Sarawak, pekebun mit sereta pengari Opis Servis Veterinar Bagi Menua Bintulu enggau Opis Betanam Betupi Bagi Menua Bintulu.
Ba pejalai nya, bemacham pekara dikerandau baka program agro pemakai Risda ungkup projek nupi manuk enggau burung puyuh ke alai lima pekebun mit Risda ari Kampung Sungai Selamak enggau lima iku agi ari Kampung Sepadok, Bintulu deka ngemujur projek kerejasama enggau UPMKB.
Ku Shaharuddin, inisiatif projek ari Risda nya sebagi ari chara ngemujur juluk perintah nengah Polisi Agro Pemakai Menua 2021- 2030 dikena ngurangka pengawa bepanggai ngagai produk import.
“Polisi tu ngeranchak baru industri pemakai menua dikena nambahka untung enggau produktiviti sereta nyungkak industri pemansut betanam betupi meruan agi,” ku iya nerang penerang ba ruai Facebook UPMKB.
Sama datai Sapit Direktor PPP Prof Madya Dr Amy Halimah Rajaee, Tuai Unit Pengawa Nupi Jelu enggau Akuakultur Dr Carlina Freddie Simol sereta Tuai Unit Bekebun enggau Kampung Nalong Buda.
