Pekit E-Sport di Baleh, 26 Disember tu

KAPIT: Pekit E-Sport PUBG Mobile Tetutup Baleh deka diatur kena 26 Disember tu.

Pekit tu diatur Raban Indu enggau Raban Nembiak Parti Rakyat Sarawak (PRS) DUN N.64 Baleh enggau kerejasama Palan Servis Baleh sereta Gerempung Lumba Elektronik Batang Rajang.

Ku pengari, pekit deka diatur ba Dewan Sri Baleh, Kapit ari pukul 2 lemai nyentuk 10.30 malam.

Pia mega ku iya, pekit tu ditatak ngagai 25 raban ti tumu rejister.

“Ketuai tim deka dipasuk dalam group randau aplikasyen Whatsapp ngambi meri penerang pasal program enggau pekit pengudah nyuaka bayar rejister.

“Champion deka nerima RM500 besereta hamper, setipikit, midul enggau trofi.

“Lumur dua deka mai pulai mata duit RM300, hamper, setipikit enggau midul.

“Lumur tiga deka mai pulai mata duit RM200, hamper, setipikit enggau midul,” ku iya seraya madahka semua ti masuk pekit tu deka nerima setipikit.

Iya madahka sida ti masuk pekit tu dipinta mayar RM40 enggau nganjuhng pom ngagai raban pengatur tauka ba Palan Servis Dun Baleh.

Pia mega ku iya, Baleh E-Sport Mobile Challenge mega deka mantaika Pekit Main Bol entara tim Liga Perdana Inggeris iya nya Leicester City enggau Manchester United.

Sapit Kepala Menteri ti mega Menteri Infrastruktur Dan Pembangunan Pelabuhan Sarawak sereta Presiden Parti Rakyat Sarawak (PRS) ti mega Adun Baleh, Tan Sri Datuk Amar Dr James Jemut Masing deka datai ngerichahka agi program sehari nya.

“Bala nembiak tu deka belepa ujung minggu tau nyereta kami enggau nganjung tim kita masuk Pekit PUBG Mobile Tetutup lalu kitai ulih meda pekit main bol Liga Perdana Inggeris,” terang pengari nya.

Barang sapa ti deka masuk pekit tu tau tanya pengatur pekit, Abdul Taib Rosli ba lumur, 016-3105590, Omar (014-8783148) tauka Jara (013-3005482).

Kita tau ngambi pom ba Palan Servis Dun Baleh di Lot 546, Ringkat Dua, Jalai Penghulu Nyanggau, P.O Box 4113, 96807 Kapit, Sarawak tauka telefon nuju 084-797439.