BELAGA: Pekit Lumba Perau Kayuh nyerumba Regatta Belaga 2023 diatur empai lama chukup richah lalu nerima timbal ti chukup manah ari peranak ditu.
Pekit belabuh pukul 7.30 pagi enggau lumba renggat ‘saringan’ ngaul lapan pengayuh ba kategori lelaki enggau indu.
Udah nya, pengawa ditampung muak ke lemai enggau renggat ‘saringan’ ti ngaul 10 enggau 15 pengayuh ba kategori sebaka.
Sapit Menteri Utiliti enggau Telekomunikesyen (Komunikesyen), Datuk Liwan Lagang enggau bini, Datin Rosnie Bilang bisi datai meda pekit lumba nya muak ke pagi.
Kelimpah ari lumba ai, sekeda pengawa bukai mega bisi diatur dikena mantaika penyelai main asal Orang Ulu ba pelilih nya.
