Pekit Ngarang Intergriti 2019: Meri penyedar pasal Intergriti, makai suap

“Entara tuju pekit tu diatur mega uiya nya nyadi siti ari jalai kami ngulihka timbal ti pandak ari komuniti bekaul enggau intergriti sereta Ombudsman sereta nerenakka ulah intergriti ba diri empu.”

KUCHING: Mensia mayuh bela diperansang nyereta Pekit Ngarang Intergriti 2019 ti berengkah ari 1 Jun ngagai 30 November 2019.

Menteri ba Opis Kepala Menteri (Intergriti enggau Ombudsman) Datuk Talib Zulpilip madah pekit tu siti ari penyambung ngagai Pekit Ngarang enggau Ngaga Video Pandak 2018.

“Tuju ngatur pekit tu ngambika mensia mayuh sedar enggau pekara bekaul enggau intergriti sereta makai suap lebih agi ngagai bala nembiak.

“Entara tuju pekit tu diatur mega uiya nya nyadi siti ari jalai kami ngulihka timbal ti pandak ari komuniti bekaul enggau intergriti sereta Ombudsman sereta nerenakka ulah intergriti ba diri empu,” ku iya.

KOD QR… Talib scan Kod QR ti nyadi siti ari chara mensia mayuh ngulihka penerang bekaul enggau Pekit Ngarang Intergriti 2019.

Talib madah munyi nya rambau aum pemberita ti diatur di Begunan Baitulmakmur ditu, kemari.
Nangkan nya, ku iya, bisi lima bengkah kategori pekit ti dibuka.

“Entara pekit nya, Pekit Ngaga Puisi, Pekit Ngarang Jerita Pandak Jaku Melayu, Pekit Ngarang Jerita Pandak Jaku Iban, Pekit Ngarang Esei Jaku Melayu enggau Pekit Ngarang Esei Jaku English.

“Tiap bengkah kategori tu dibuka ngagai semua anak Sarawak enda ngira alai diau, sereta bala mayuh ari nengeri lain ti diau di Sarawak,” ku iya nerang enggau silik.

Ku Talib, tu mega kerejasama keterubah Union begulai enggau Gerempung Penulis Sarawak.

“Ngarapka mayuh agi orang ngerejista diri enggau pekit tu lebih agi ngagai sida nembiak ba renggat sekula.

“Nya deka ngemuntangka agi kami nunjukka pekara bekaul enggau intergriti lalu apai indai patut meri sukung ti penuh ngagai bala anak sida ngambika masuk pekit tu,” ku iya.

Kelimpah ari nya, ku Talib pom enggau atur pekit tu tau digiga ngena Kod QR ngambika ngemuntangka agi pengawa ngulihka penerang bekaul enggau pekit tu.

Pia mega, penerang ti silik tau ditanya ngagai emel penulissarawak@gmail.com, faks ba lumbur 082-646471 tauka whatsapp ba lumbur 012-8858887.

Sama ngulu aum nya Presiden Gerempung Penulis Sarawak Zaid Zaidel Jamil enggau sapit iya, Ali Hossen Abang.