KUCHING: Sepenyampau 4,320 nembiak ari 927 tim ari 285 sekula ba selampur menua mujur masuk Pekit Techlympics 2022 Renggat Final Nasional, kemari.
Nitihka penerang ba ruai Facebook Datuk Francis Harden Anak Hollis, semua nembiak tu deka bepekit ngerebut gelar champion ba enam kategori ti bisi diatur ba renggat zon.
Ungkup penerang, pekit nitihka zon udah berengkah dipejalaika ba bulan March tu tadi.
“Pekit tu diatur dikena mantaika buah runding baru nembiak ti bebida pasal robotik pintar bepelasarka teknologi.
“Kebuah pia laban rebak baru mih ti deka nampung megai menua dalam jeman pemansang teknologi ti tinggi.
“Pia mega, program tu diatur dikena nelebaka nembiak sekula primari ari selampur menua pasal penemu sains sereta teknologi berambaika jaku ‘Begulai, Besemekih, Nyulut,” ku iya.
Sarawak udah nganjung 162 nembiak ari semua sekula ba selampur menua tu masuk pekit renggat final ti diatur Opis Menteri Sains, Teknologi enggau Inovasyen Malaysia (Mosti).
Program Nutup Pekit Techlympics 2022 Renggat Final Nasional nya udah dipenyadi Tuai Sekretari Mosti, Datuk Aminuddin Hassim ba Stadium Axiata Arena Bukit Jalil, Kuala Lumpur.
Sama datai Sapit Menteri Pekara Pelajar, Inovasyen enggau Pemansang Penau (MEITD), Datuk Francis Harden Hollis ngarika Menteri Pekara Pelajar, Inovasyen enggau Pemansang Penau (MEITD), Datuk Roland Sagah Wee In.
