PELAJAR pechuma ungkup peranak menua tu ba palan pelajar tinggi ti dipenggi Perintah Sarawak disadang belabuh dipejalai ba taun 2026, ku Premier Sarawak, Tan Sri Abang Johari Tun Openg kena 1 Oktober taun tu tadi lebuh nutup Pengerami Benak di Simanggang.
Ku iya, penatai pemisi Sarawak ninting taun ti majak niki belabuh ari taun 2020 meri pemerani ngagai iya netapka tagit penatai pemisi Perintah Nengeri taun tu.
“Aku ulih nyebut taun 2026 (belabuh nyendia pelajar tinggi pechuma) laban aku udah ngenuku ke ekonomi kitai deka lebih teguh ba taun 2026.
“Enti ba taun 2022, penatai pemisi nengeri udah nambah ngagai RM12 bilion, aku ngira taun tu melaba ke penatai pemisi kitai deka mechah rikod taun 2022 nya,” ku Abang Johari.
Ku iya, tuju pelajar tinggi pechuma disedia ngambi mayuh agi peranak Sarawak bulih kualifikasyen lalu ulih ngena teknologi baru nyungkak pemansang nengeri tu.
“Kitai udah bisi turu pesaka bansa dikena jemah ila. Kelimpah ari nya, kitai deka fokus ngagai pelajar bala anak kitai kelimpah negapka ekonomi sereta ngemansang infrastruktur kitai,” ku iya.
Perambu perintah deka nyendia pelajar tinggi pechuma ungkup peranak Sarawak ba universiti ti dipenggi perintah nengeri mega disukung penyakal.
Ku Chairman Parti Tindakan Demokratik (DAP) Sarawak, Chong Chieng Jen nengah siti penerang dua hari sebedau Abang Johari madahka kemaya inisiatif nya deka dipejalai, yuran pukul rata setaun siti kus degree ba universiti perintah urung RM20,000 siku nembiak enti nadai subsidi perintah.
“Ungkup 5,000 nembiak ti diperambu, penyampau nya deka manggai RM100 juta setaun.
“Laban tebal agi kus degree ulih ditembu dalam timpuh tiga taun lalu sekeda empat taun, enggau ngira kus degree pengelama tiga setengah taun, kos maksimum ti ditanggung perintah ninting taun RM350 juta,” ku Chong.
Nengah penatai pemisi Perintah Sarawak ninting taun ngelui RM10 bilion, penyampau RM350 juta semina urung 3.5 peratus aja ari penatai pemisi perintah genap taun, enda ngira penatai pemisi perintah ti nambah ila.
“Ari sukut pekara wang, Perintah Nengeri udah tentu ulih nyendia penyampau tu.
“Taja pia, siti agi pekara ti tau ditanya bekaul makit pengawa sereta ulih tauka enda graduet tu diberi pengawa, patut tauka enda Latih enggau Pelajar Vokasional sereta Teknikal (TVET) diberi ngagai bala nembiak kitai,” ku iya.
Seraris enggau pemansang nuju pengawa industri, udah tentu peminta ngagai staf ti bisi latih teknikal deka nambah, lalu ba mayuh menua industri, gaji staf teknikal jauh tinggi agi ari gaji sida ti bisi Degree.
Agih belanja patut bisi dikena meri subsidi ngagai nembiak Sarawak ti benung belajar ba universiti, sekali ke dalam menua tauka ba menua luar.
MENUA PELAJAR PECHUMA
Menua di dunya tu ti nyendia pelajar pechuma baka Austria, Republik Cyprus, Republik Czech, Denmark, Finland, Jerman, Greece, Hungary, Argentina, Brazil, Cuba, Norway, Poland, Arab Saudi, Sri Lanka, Sweden, Uruguay enggau Iceland.
Sekeda menua nyendia pelajar pechuma mega ngagai peranak menua bukai tauka ngagai sekeda Degree aja.
Argentina, Lebanon, Arab Saudi, Sri Lanka, Uruguay enggau Cuba meri pelajar pechuma ba semua renggat nyengkaum kolej enggau universiti ngagai peranak menua aja.
Di Brazil, universiti pemadu mujur enggau palan pansik endang institusyen perintah ti disukung Perintah Nengeri tauka Perintah Besai.
Perintah Brazil mega meri sekularship ngagai pelajar antarabansa.
Denmark, Greece, Hungary, Iceland, Norway, Poland, Sweden enggau Finland nyendia pelajar pechuma ngagai nembiak Kesatuan Eropah/Menua Kandang Ekonomi Eropah (EU/EEA) sereta pelajar ari menua Switzerland.
Pelajar ukai ari EU/EEA dipinta mayar bayar tuisyen.
Jerman meri pelajar pechuma ngagai semua, nyengkaum peranak ari menua bukai.
Taja pia, patut diperati, pelajar pechuma engka diberi ngagai sekeda peranak menua aja tauka ngagai sekeda Degree aja.
Chara melanja pelajar pechuma ba siti menua enda sebaka enggau menua bukai.
Mayuh menua ti meri pelajar pechuma, baka Jerman, Denmark enggau Finland, ngeletak chukai tinggi ti dikena melanja pelajar.
Sekeda menua, baka Argentina, Cuba, Lebanon, Arab Saudi enggau Sri Lanka nyendia pelajar pechuma ba semua renggat, nyengkaum kolej enggau universiti, ngagai peranak menua nengah agih belanja perintah.
Brazil meri sekularship ngagai pelajar antarabansa ngambi belajar ba palan pansik enggau universiti perintah sida.
Ba sekeda menua, baka Amerika Syarikat, belanja peribit ulih dikena nyukung pelajar pechuma.
Taja mayuh universiti ba serata dunya nadai yuran tuisyen, sida tetap minta bayar mimit, ti disebut administrative fees iya nya yuran dikena melanja servis ti bisi kaul enggau pengawa ngatur sereta matau bala nembiak.
SISTEM PERESA KEDIRI
Ba lansa bukai, Sarawak deka mungkal sistem peresa kediri empu, baka peresa Ujian Pencapaian Sekolah Rendah (UPSR), dikena meresa pemujur nembiak Primari Enam ba semua sekula perintah di nengeri tu.
Menteri Pelajar, Inovasyen enggau Pemansang Penau Sarawak, Datuk Seri Roland Sagah Wee Inn madah, pekara nya beguna amat dikena nentuka dini nembiak nya patut diengkah, ba kelas sains tauka kelas sastera.
“Tu aja meh chara kitai nemu pemujur nembiak ke bendar,” ku iya ngagai pemberita pengudah bejadi Aum Besai Inovasyen enggau Pansik Pelajar Antarabansa 2023 (iCERI2023) ba Palan Pelajar Pengajar (IPG) Kampung Tun Abdul Razak di Kota Samarahan, Kuching.
Ku iya, nembiak ti diengkah sepeneka ati ba kelas ti enda nipak ke penau enggau pemandai sida udah tentu deka napi penusah.
“Awak Perintah Besai ngetanka polisi sida tang seraya nya, awak ke Perintah Nengeri bejalaika sistem peresa kediri empu,” ku iya.
Iya mega madah, opis iya bedau agi nerima sebarang pelin pengawa ti bisi kaul enggau kurikulum sekula baru taun 2027 ti dikemansang Opis Menteri Pelajar Menua Besai (MoE).
“Aku pechaya Perintah Besai benung bejalaika pansik dikena ngumpul feedback mensia mayuh,” ku iya.
Sebedau nya, Menteri Pelajar Malaysia, Fadhlina Sidek kala nyebut taja pen bisi peminta ari sekeda pemegai taruh, MoE nadai perambu deka ngidupka agi peresa UPSR.
Ku iya, fokus diatu diberi ngagai kurikulum ba taun 2027 nengah roadshow tauka tour dikena ngumpul feedback pasal kurikulum sekula baru.
“Tuju kurikulum baru nya ngambi negap sistem pelajar dikena jemah ila.
“Apai indai diatu patut nulung opis nya lalu meri feedback sida ngambi mantu kitai fokus ngagai peresa ti meruan ungkup bala anak kitai, kelebih agi ba genap pemansang sida,” ku iya kena 1 November tu tadi.
OTONOMI PELAJAR
Sarawak meseti nempa sistem pelajar ti nemban ungkup peranak Sarawak.
Perati patut diberi lebih agi ngagai tiga pekara pemun ba renggat primari, iya nya macha, nulis enggau ngira, ngambi bala nembiak ulih nguasa nya dulu sebedau sida niki ngagai pelajar ti dalam sereta tinggi agi.
Enti kitai deka nemu naka ni pemujur sida macha, nulis enggau ngira, sida meseti diperesa dulu ngambi kitai nemu pengelebih tauka pengelemi tiap iku nembiak ari sukut akademik lalu ngengkah sida ba kelas ti patut ba renggat sekula sekondari.
Mayuh ari kitai enda sabar nganti taun 2026 ngambi ulih nganjung bala anak enggau uchu kitai ti patut tang enda chukup belanja ngagai universiti sereta palan pelajar tinggi ti dipenggi Perintah Sarawak.
