SELANGOR: Program Ngabang Uniti Gawai enggau Kaamatan 2023 sereta Pekit Ratu Pesta Menuai 2023 tu mujur ngempung bala pedagang, raban korporat, pemikir, pengemeran budaya enggau raban akademik ngambi begulai nyikap pemereti modal mensia.

Senator Datuk Noraini Idris madah, pelasar tu mega nyadi nalan semua pemekit berandau, bekunsi buah runding, nanggam kerejasama enggau organisasyen sereta bala bukai.

Ku iya, program baka tu meseti bejalaika tanggungpengawa engkeman ba arus pemansang budaya menua.

“Program baka tu mega nyadi pelasar penyerakup dikena negapka agi semangat beserakup ke udah lama ditanggam ba menua tu.

“Nyadi siku ari rayat Malaysia enggau Kaban Parlimen ke udah ngemujur bemacham aktiviti ngintu pengelantang enggau program di Semenanjung Malaysia, aku udah meda revolusyen ke nyengala dipeda.

“Enti suba, Pengerami Gawai Dayak enggau Kaamatan tu suah diatur kediri tang sekali tu, hari besai Sabah enggau Sarawak tu diintu begulai.

“Nya kebuah, pengerami baka tu udah nunjukka penyelai ti jarang dipeda.

“Tabi puji ngagai semua ke udah ngemujur pengerami tu kelebih agi rebak biak laban udah ngangkat sukut ‘Peransang Penyerakup’ enggau ‘Negapka Raban Nembiak’ nentuka program tu meruan relevan nengah kerejasama nembiak,” ku iya.

Noraini mega meri tabi puji ngagai Opis Menteri Penyerakup Menua sereta Opis Penyerakup enggau Integrasyen (JPNIN) Selangor laban udah bekerejasama enggau Serakup Anak Borneo Semenanjung ngatur eksibisyen interaktig, pekit, demonstrasyen enggau bemacham program bukai.

Iya madah, program taun tu chukup nyukung pugu jaku perintah iya nya Kembara Penyerakup Malaysia MADANI nengah tiga kluster iya nya “Semarak Kenegaraan”, “Semarak Perpaduan” enggau “Komuniti Rahmah”.

“Pengerami Gawai enggau Kaamatan tu ukai semina diintu dikena negap asai pengaga laban udah mansutka mayuh asil padi tang pemadu beguna nya pengerami tu negapka agi kaul rayat pupu bansa di Malaysia.

“Pengerami baka tu nyadi manifestasi pengelantang enggau semangat bebaik komuniti di menua tu ngambi idup lantang enggau seati taja begulai enggau pupu bansa sereta bebida jalai pengarap,” terang iya.

Noraini madah, ‘Perpaduan Dalam Kepelbagaian’ tu nipakka pemansang komuniti pupu bansa ti penyayau enggau bebasa pangan diri.

Terang iya, pengerami tu udah diaku nyadi pengerami nasional laban dirami semua etnik enggau jalai pengarap sereta nyeremin konsep Malaysia MADANI ti udah dipungkal enggau ari buah penemu pintar Menteri Besai, Datuk Seri Anwar Ibrahim.

Nya alai, iya ngarapka Pedagang Industri Mit enggau Jelan Pemesai (IKS) ngena manah peluang tu ngelakuka produk bekualiti enggau inovasyen ngagai tikas tinggi agi.

Kelimpah ari nya, iya madahka tu mega peluang nambah penatai pemisi sereta nyungkak ekonomi rama komuniti Sabah enggau Sarawak ti ngentapka diri ba Semenanjung Malaysia.