Pelilih Lundu diatu status mirah

KUCHING: Sarawak ngerikodka 185 kes positif baru Covid-19 kemari ti ngujungka penyampau kes positif Covid-19 ba menua tu nambah 5,475 kes.

Komiti Penyangga Penusah Ngenyit Nengeri (JPBN) dalam penerang media kemari madahka kes positif baru Covid-19 pemadu besai dirikodka ba Pelilih Menua Sibu iya nya 101 kes.

Entara kes positif baru tu dirikodka ba pelilih menua Lundu iya nya 19 kes, Song (18), Dalat (12), Subis (7), Kanowit (6), Bintulu (4), Kapit (4), Bau (3), Kuching (2), Saratok (2), Miri (1), Julau (1), Meradong (1), Belaga (1), Matu (1), Kabong (1) enggau Lawas (1).

Nangkan nya, Pelilih Menua Lundu bebali ari status oren ngagai mirah kemari pengudah ngerikodka 50 kes berampit dalam timpuh 14 hari.

Pia mega, Pelilih Menua Saratok bebali ari status gadung ke status kuning pengudah ngerikodka dua kes berampit dalam menua.

Naka diatu semina semilan buah pelilih menua agi ba status gadung.

Bisi 157 kes baru udah suman sereta dikemendarka pansut ari sepital dirikodka kemari ti ngujungka kes udah suman sereta dikemendarka pansut ari sepital nambah 3,602 iku.

Sida ti dirikodka tu pansut ari Sepital Sibu (72), Sepital Miri (60), Sepital Bintulu (12), Sepital Besai Sarawak (10) enggau PKRC Sepital Kapit (3).

Pia mega, bisi 270 kes Pesakit Agi Dipatau (PUI) dirikodka kemari, ke alai 23 PUI agi nganti pemutus peresa makmal.