Pelilih Sarikei mali kuning

KUCHING: Pelilih Sarikei udah bebali baru ari status gadung ngagai status kuning pengudah ngerikod 15 kes berampit dalam menua ba timpuh 14 hari ke udah.

Sekretariat Komiti Penyangga Penusah Nengeri Sarawak (JPBNS) madahka Pelilih Kapit, Song, Dalat, Bintulu, Kanowit, Miri, Sibu enggau Kuching mengkang ba status mirah.

Ku penerang nya, lapan pelilih nya mengkang ba status mirah laban ngerikod 1,961 kes berampit ba timpuh 14 hari ke udah.

Sarawak ngerikod 121 kes baru positif Covid-19 ke alai 37 kes di Sibu, 25 kes di Miri, 21 kes di Kapit, 10 kes di Dalat, semilan kes di Bintulu enggau empat kes di Mabong.

Pia mega, bela tiga kes di Kuching, Song enggau Beluru, dua kes di Serian sereta bela siti kes di Sarikei, Kanowit, Julau enggau Selangau ngujungka kes nambah ngagai 4,676 kes.

Bisi 148 kes udah suman enggau dikemendar pansut ari sepital ke alai 101 iku ari Sepital Sibu, 18 iku ari Sepital Bintulu enggau 15 iku ari Sepital Besai Sarawak (SGH).

Pia mega, 10 iku ari Sepital Miri enggau empat iku ari Sepital Sarikei ngujungka kes udah suman nambah ngagai 2,985 iku tauka 63.84 peratus.

Naka tu, bisi 1,635 iku agi diperubat ba wad isolasyen ke alai 862 kes di Sepital Sibu, 315 kes di Sepital Miri, 159 kes di SGH, 132 kes di Sepital Bintulu, 138 kes di Sepital Kapit (PKRC Kapit) enggau 24 kes di Sepital Sarikei.

Nambahka nya, empat kes di Sepital Limbang enggau siti kes di PKRC Sipitang, Sabah seraya 145 PUI baru udah dirikod enggau 27 PUI agi nganti pemutus peresa makmal.

Suara Sarawak