GEDONG: Perintah Sarawak deka mantaika Pelin Mulaika Pemanah Ekonomi Pengudah Covid-19 nya entara inisiatif nyapai tagit nyadi menua maju manggai taun 2030.
Kepala Menteri Datuk Patinggi Abang Johari Tun Openg madahka pelin tu benung dilangkar ke alai pelin tu deka nyendiaka pengawa puang baru ngagai sida ke putus pengawa ketegal pandemik Covid-19 tu.
“Aku andalka ekonomi kitai deka pulai baka selama enggau pemisi vaksin Covid-19 tu.
“Kami deka bejalaika pengawa ke patut dikena mulaika pemanah ekonomi menua,” ku Abang Johari.
Abang Johari mansutka jaku nya lebuh bejadika Projek Jiwa Murni (PJM) beserimbai enggau Hari Soldadu Darat Malaysia (ATM) Ke-88 di Dewan Masyarakat Gedong, ditu ensanus.
Nambahka nya ku Abang Johari, sida ngembuan tuju ke terang deka nyapai status menua maju manggai taun 2030 seagi Perintah Sarawak dipegai iya.
“Perintah dipegai aku deka nyendiaka tuju baru ngambi kitai nyapai tagit dekaka menua tu nyadi menua maju manggai taun 2030 nengah Pelin Mulaika Pemanah Ekonomi Pengudah Covid-19.
“Enti suba, kitai ngelala sapa munsuh kitai tang diatu balat agi laban igi penyakit nya nyau enda dipeda lalu nyau deka ngasuh semua sektor kusut,” ku iya nerang.
Sama datai Panglima Soldadu Darat Malaysia Jeneral Tan Sri Datuk Zamrose Mohd Zain, Kaban Parlimen Batang Sadong Datuk Seri Nancy Shukri enggau Sekretari Perintah Sarawak, Datuk Amar Jaul Samion.
