KUCHING: Bala peminat K-drama Korea Selatan Full House, filem Hollywood Speed Racer sereta Ninja Assassin diatu ulih betemu terus enggau ikon K-pop Korea Selatan ti mega bintang filem Rain ba Meet and Greet kena 4 Ogos tu.
Rain deka ngulu Pengerami enggau Anugerah Filem Antarabansa Asean (AIFFA) 2023 nyadi Bintang Selebriti ti deka diatur kena 2 nyentuk 4 Ogos.
Gerah nya digaga ba pengawa besai mandangka filem AIFFA, Sumpahan Jerunei kena 20 Julai (Hari Empat) tu kemari.
Sama datai ngulu program nya, Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah.
Program Meet and Greet nya deka diatur ba Old Court House kena 4 Ogos pukul 3.30 lemai lalu mensia mayuh diperansang ngulu Malam Gala AIFFA 2023 enti deka betemu enggau Rain.
Tikit bisi dijual ba Facebook AIFFA, website tauka ulih betelefon terus ngagai Ros ba lumur 017-6306851 sereta ba reruai AIFFA ba Old Court House berengkah ari 2 nyentuk 4 Ogos.
Abdul Karim ngelalu mensia mayuh sampal ngulu pengerami tiga hari nya sereta ngaul diri ba bemacham aktiviti enggau pengawa mandangka filem pechuma ba palan nya ila.
Direktor Pengerami AIFFA 2023, Livan Tajang ba sebengkah penerang madah, pemutus bala komiti AIFFA ngagauka Rain nyadi temuai khas ba AIFFA 2023 nya bepelasar ke penau nyelai dikembuan iya.
Iya madah, pekara nya ulih dipeda ba industri kreatif enggau seni pemerindang ti mujur matak bejuta pengusung ngagai Korea Selatan sereta narak minat dunya bekaul mayuh pekara senentang Korea.
Ku iya, penau nyelai nya mungkur industri muzik enggau filem laban Rain siku penanyi, penengkebang lagu, pelakun enggau pengeluar muzik.
