Peluang nembiak maju ba dagang digital

BETONG: Sarawak bisi pengulih besai ngemansangka industri bepelasarka ekonomi digital.

Adun Layar Gerald Rentap Jabu ngaku, Strategi Mulaika Pemanah Ekonomi Pengusah Covid-19 nyentuk 2030 dibantaika Kepala Menteri Datuk Patinggi Abang Johari Tun Openg deka meri penguntung ngagai raban nembiak ba menua tu.

“Ba penemu aku, strategi tu meri awak kelebih agi ngagai raban nembiak menua tu chakah ngaul diri belajarka penemu bepelasarka ekonomi digital.

“Sida mega ulih ngerebut peluang ngena pelasar aplikasyen pintar ngemajuka diri ba dagang nengah chara baru lalu ulih nelebaka diri ba gaya idup baru tu,” ku iya ke mega Chairman Raban Nembiak GPS lebuh dirandau, kemari.

Rentap madah, pengawa bekenaka ekonomi digital baka Palan Penerang, Penerang analitik, Pekara Nyata, artificial intelegence (AI) enggau ke bukai begunaka bekal kuasa karan.

“Reti iya, kitai ulih numbuhka industri bukai baka minyak enggau gis, pemansut asal, industri bepengulih besai kelimpah beratka pengawa ngintu enggau nyaga rampa menua.

“Pekara ti patut diperati kitai diatu iya nya pengulih enggau pengeraja asal Sarawak ulih dikena mansutka kuasa karan nengah hidro,” terang iya.

Suara Sarawak