KUCHING: Siti produksyen filem Iban ke diberi nama Kaban diatu benung ngiga barang sapa ti bisi ati nyadi pelakun.
Pengeluar filem tu, Misha Minut Panggau nengah penerang ke dikunsi iya ba laman Facebook madahka tu siti ari berita manah tauka peluang ngagai bala anak Dayak.
“Diatu chukup tusah deka begempuru tauka deka ngatur audisyen ngiga pelakun ke patut berengkah digaga dalam bulan tu (April) beduduk ari pengerekai penyakit Covid-19 di Sarawak.
“Ngambika enda mayuh masau jam, aku ngasaika deka ngiga pelakun nengah aplikasyen ‘Zoom’ tauka Skpe,” ku tandu iya dalam penerang nya, ensana.
Berebak enggau nya, Misha ke mega asal ari Rumah Temenggong Jarom, Malaban, Limbang madah enti nitih maya tu iya udah datai di Kuching tang ketegal nangika penyadi Covid-19 ke majak niki perambu puntan.
“Aku takut ‘sup betis’ (Swap test) enggau seletip (swab test) sereta ‘gerintin’ (kuarantin) dua minggu,” ku iya betundi dipelaba nunda jaku audio dalam WhatsApp ke kala dikerembai ba media rama.
Ngagai sapa ti deka nguji mantaika penau diri tau madahka penerang diri nuju Skye Katerina Nina Fescie ba lumur 019-8915509.
Berebak enggau nya, Misha bisi ngelansa mimit pasal perambu jalai cherita filem Kaban. Tu kebendar genre jenaka nyeritaka pejalai dua iku diri sebakih benama Engkang enggau Kunyo datai ari dunya kelia ke dunya moden ti betemu enggau mayuh ragam mensia.
“Laban kelia adat sereta pengidup dunya udah enda sebaka, nya alai seduai iya tusah deka nyelat orang bukai sereta ngujungka seduai suah kena keduan.
“Seduai bisi ati deka pulai ke dunya kelia baru tang enda nemu jalai. Udah nya Kunyo bekelala enggau siku bakih ba Sepital Gila nguji nulung seduai iya pulai ngagai dunya kelia.
“Ulih ke enda seduai bakih tu mujur pulai ke dunya kelia, semua saut nya deka ditemu pengudah meda filem tu tembu,” ku iya seraya ngandalka filem tu ulih dipeda ba TVS.
Ungkup penemu Misha tu penulis skrip, pelakun filem Belaban Hidup : Infeksi Zombi ti udah mujur menang lima anugerah filem ba renggat entarabansa.
Entara nya ba Karnival Filem Dunya Singapura menang Kategori Cherita Berantu Pemadu Manah enggau Sains Fiksyen, kedua ba Festival Filem Seni Lambang Entarabansa di Rusia (Kategori Cherita Berantu Pemadu Manah) ditangkan ba Festival Filem Paris di Peranchis (Kategeri Cherita Berantu Pemadu Manah) enggau ba Festival Filem Diversiti Kanada (Kategori Cherita Filem Pemadu Manah). Iya ke pemadu baru tu iya nya menang ba Anugerah Filem Sweden (Kategori Cherita Pemadu Manah).
