Pemaik tulang belakang Perintah S’wak

KUCHING: Gerempung Ketuai Raban Bansa Enggau Tuai Rumah Bansa Iban Bagi Menua Kuching (Pemaik) ulih nyadika pengering Perintah Sarawak nyukung pinta enggau polisi perintah.

Sapit Kepala Menteri ti mega nyadi Menteri Wang Kedua Datuk Amar Douglas Uggah Embas madah Pemaik ti nyengkaum bala ketuai raban bansa enggau tuai rumah ulih nyadi orang keterubah meri penerang pasal polisi perintah menua tu.

“Tu nyengkaum program ti udah dipejalai ngambika ulih ngerumban pemansang sereta ngintu pengelantang idup nembiak redak di baruh pegai sida ditu.

“Nya alai raban Pemaik diperansang nempa kaul kerejasama enggau gerempung ukai dikuasa perintah (NGO) ke bukai mantu bansa Iban ti diau ba genturung setinggan kelebih agi ke bisi diatu,” ku iya ke mega Menteri Betanam Betupi, Tanah Adat enggau Pemansang Kandang Menua.

Teks jaku nya dibacha Sekretari Politik Kepala Menteri Petrus Igat Mathias ba pengawa bejadika Aum Besai Ninting Taun (AGM) Pemaik Ke-4 ba sebuah hotel ditu tadi.

KENA MANAH…Petrus Igat (kanan) nyuaka chek ari Datuk Sim Hui Kian ngagai Ex-Chairman Pemaik, Penghulu Gunting Huang (kiba). Gambar NURUL FADZLYN ZAMURY.